Crop Insurance Scheme - PMFBY 2025-26 hman tum

Agriculture Minister PC. Vanlalruata’n Mizoram-ah khuarel chhiatna avanga huan thlai chan te tana chhawmdawlna, Crop Insurance Scheme - Pradhan Mantri Fasal Bima Yojana (PMFBY) 2025-26 chu hman thuai a ni dawn tih a sawi.

Agriculture Minister hian tunhnaia ZPM Chhung Inkhawmah Mizoram-a loneituten an huan thlai hrang hrang khuarel chhiatna emaw, rannung puang emaw avanga an hlohna man hu an hmuhlet theihna tur Crop Insurance Scheme chu peihfel tep tawh a nih thu leh Committee indin felin a taka kalpui turin theihtawpa chaka thawh mek a ni tih a sawi a. Hemi kawngah hian TATA AIG General Insurance Company chu sawrkarin a thawhpui dawn tih sawiin, PMFBY hnuaiah Khawkheng, tuilian, thlai hrik leh natna hri, leimin, natural fire, Tek, thlipui leh rial vanga chhiatna te insure theih a nih thu leh a insurance leina man (Premium rate) chu Fur thlai Cereals & Pulses-ah zaa 2 leh Commercial Crop-ah zaa 5 niin Thlasik thlai-ah chuan Cereals & Pulses hi zaa 1.5 leh Commercial hi zaa 5 a nih thu a sawi.

PMFBY hnuaiah hian Horticulture Crop dang pawh awmin Season khat chhung atan zel a ni a, Kum dangah chuan Insurance Company rawn intatlut duh te zawn thin a ni a, kuminah chuan sawrkar laipui hnuaia Agriculture Insurance Company te nena hmalak ho tur a ni dawn a. PMFBY kalphungah hian Central Share, State Share leh Loneitute tum ve tur te a awm a. Loneituten an pek ve tur chhawk zangkhai turin Mizoram sawrkar chuan loneitute (crop insurance) premium pek ve tur chu thahnem tak a tum dawn a ni.