Inremna Sa Ui tan

Tourism Department leh Khawhai khawtlang in an buatsaih Mizoram-a la awm ngai lo Remna Kut, ‘Peace Fest 2025’ chu ni hnih chhung Khawhai-a neih a nih hnuah Inrinni, October 25, 2025 khan a tiak, he hunah hian inremna Sa Ui tanna hun hman a ni.

Peace Fest 2025-ah hian kum 133 kalta a Dawn Pasalthate leh Chawngtlai khaw pasaltha Lal Nikuala te inbeihna hmun, Pawi thah kawn, Khawhai tlangah inremna Sa Ui tan a ni a. Sa ui tan tur hian Myanmar-a Dawn khua atangin palai 30 chuang an rawn kal a, pasaltha hruaitute ve ve, Dawn Pasaltha Ralbila leh Nikuala pasaltha Chawngluta thlahten inremna hi an siam a, Pasaltha Ralbila thi pawh a thlahte hnenah pek let leh a ni a, Dawn khaw lamah an hawn hnuah hun remchang hmasa berah Aizawl Museum-a dah tura ruahman a ni.

Peace Fest 2025 hi Adviser to Chief Minister Lalmuanpuia Punte MLA chuan khuallian nia hmanpuiin he Peace Fest hi kumtin hman chhoh tura ruahman a ni a, Festival chhung hian Peace Concert, Nghakuai Chiah leh Cultural programme hrang hrang neih a ni.