Mizoram-ah HIV kai mi 32,544 hmuh an ni tawh

Kum 1990 atanga kumin 2024-2025 thlengin Mizoram-ah HIV kai mi 32,544 hmuhchhuah an ni tawh a, Mizoram-a HIV kai hmuhchhuah zawng zawng atangin zaa 63.93 chu mipat hmeichhiatna hman atanga kai niin Inchiuna hmanrua (needle/syringe) inhman tawm atanga kai zaa 30.80 an awm bawk. Mizoram-ah hian a thlawna HIV kai leh kai loh enna hmun, Integrated Counselling & Testing Centre (ICTC) 39 a awm a, HIV kaite enkawlna ART Centre 14 a awm a. District tinah ICTC leh ART Centre awmin HIV Estimation 2023-in a tar an danin Mizoram Adult HIV Prevalence chu zaa 2.73 a ni a, National Adult HIV Prevalence chu zaa 0.2 a ni.

Mizoram-a HIV kai hmuhchhuah zingah kum 25-34 inkar an tam ber a, zaa 41.49 zet an tling a, kum 35-49 inkarin dawtin zaa 27.99 an tling bawk a, kum 14-24 inkar zaa 21.56 niin kum 50 chunglam zaa 6.24 an tling a, kum 14 hnuai lam za a 2.72 an tling bawk a. Mizoram-a HIV kai zingah mi 5,632 an thi tawh bawk a ni.