Damdawi tha lo ah fimkhur turin mipuite chah

Health Department-a Food & Drugs Administration Wing chuan ramchhung State thenkhat a damdawi thalo avanga harsatna an tawh mek ang chu kan State a thleng ve thei anih avangin hriselna lama thawktute leh a hmangtu mipuite an fimkhur a pawimawh thu an sawi.

Thuchhuah an siamah Food & Drugs Administration Wing chuan Damdawi tel lovin damlo enkawl dam tak tak theih a nih loh thu leh damlo a dam theih nan Doctor leh thawktu dangte an tanrual ngaiin, khawl tha leh changtlung ber berte hmanga beihna piah lamah damdawi quality tha (Standard drugs) ngei damlo in a ei a ngai tih an sawi a. Damdawi siamtu Company India ramah hian sing chuang a awm thu an sawi a ni.

Damdawi te chu a siamna hmanrua (raw-materials) zawng zawng test hmasa thlapin siam a nih thin thu leh siam lai mek (half finished) pawhin test tur niin siam zawh tawh pawh hralhchhuah a nih hmain test leh thlap tur leh Test a paltlang chauh hralhchhuah tur a ni tih an sawi a. Amaherawh chu, Company-ten chung thil chu an zawm thlap thlap em tih erawh ngaihtuah tham a nih thu leh Dan zawm tha tawk lo awm palh theih a nih thu sawiin, “India ramah hian damdawi lem (spurious drugs) hmuhchhuah a awm zauh zauh a, chungte chu damdawi siam phalna licence pawh nei lo, a ruka siamtute thil tih a ni thin a, chungte chu pawn lam landan ah chuan damdawi tha pangngai ang mai an ni thin a, Laboratory-a test a nih loh chuan hmuhchhuah a har em em a ni,” an ti.

Damdawi quality endik chungchanga mawhphurtu chu Food & Drugs Administration Wing (FDA), Health Department an nih thu leh sawrkar-in supplier-te hnen atanga a lei damdawite leh mimal Pharmacy-a zawrhlai damdawi sample-te lain, Laboratory-ah an thawn thin tih FDA thuchhuah chuan tarlangin, Mizoram-ah damdawi quality test-na kan la neih loh avangin Regional Drug Testing Laboratory (RDTL), Guwahati-ah thawn thin a nih thu an sawi a, Damdawi quality test tura State danga thawn ngai a nih avangin senso a tam hma thu leh kum 2024 October thla atanga Internal Performance Agreement – Mizoram Health Systems Strengthening Project (IPA-MHSSP) hnuaiah Damdawi Quality Endik hi rinluh a nih tak hnuah leh NABL Acredited Private Laboratoty EFRAC, Kolkata-a thawn tel a nih hnuah erawh damdawi enfiah hi a tam tak thu an sawi a. Kum 2022-23 chhungin Sample 106 enffahin kum 2023-24 chhungin 121 leh IPA-MHSSP (Oct.’24- Sept.,’25) ah chuan damdawi 800 zet test a ni ta tih an sawi a, heng zingah hian damdawi man tlawm 100 enfiah ah Quality tha lo (Not of Standard Quality) pahnih leh damdawi pangngai 700-ah 21 hmuh a ni tih sawiin, hetiang hi kan dinhmun anih avang leh State thenkhat a damdawi tha lo avanga harsatna an tawh ang chu tawk thei kan nih avanga fimkhur a tul thu an sawi a ni.