Kumin ah Dengue kai mi 398 an awm tawh

Health Department hnuaia State Vector Borne Disease Control Programme (SVBDCP) chuan Aizawl khawpui chhung Veng hrang hrang ah Dengue a hluar thu an sawi a, kumin hian Mizoram-ah Dengue kai mi 398 an awm tawh a ni.

Health Department thawktute sawi danin Dengue natna vei hi kum 2012 atang khan Mizoram-ah hmuh tan a ni a, chhinchhiah danin a vei hi an vaiin mi 6,210 hmuh tawh an niin thihpui mi pariat an awm tawh bawk a. Mizoram-a Dengue kai hmuhchhuah tam ber kum chu kum 2023 kha niin  mi 2,060 hmuhchhuah a ni a, thihpui pahnih an awm a. Kum 2022 khan hri kai mi 1,868 hmuh niin mi panga an thi a, nikum khan hri kai mi 744 hmuh a niin thi pakhat a awm a, kumin hian Dengue kai mi 398 hmuh niin nunna chan an awm lo a ni.

Kumin a hri kai hmuhchhuah an tlem chhan hi a test na khawl 'Elisa' hmanga hmuhchhuahte chauh hri kaia pawm an nih vang niin an sawi a. Health Department-a thawktute chuan, “Damdawi In leh Laboratory hrang hrangah Rapid test khawl hmangin Dengue hri kai mi engemaw zat hmuhchhuah an ni a, mahse Central lamin Civil Hospital, Aizawl leh Lunglei-a Elisa test na khawl hmanga positive an finfiahte chauh hri kaia pawm an nih vangin hri kai zat hi a tlahniam ta a ni,” an ti a. Hetihlai hian Dengue natna vei hmuhchhuah an tam tih sawiin, “Elisa khawl hmanga Dengue hri kai kan finfiah hi chu hri kai zat ttanga chhutin 10% emaw vel chauh an ni a, a dang 90% vel hi damdawi In leh Laboratory atanga hmuh an ni a. Mahse Rapid Test hi sawrkar laipuiin a pawm ve loh avangin Dengue hri kai tam zawk hi chu hri kaiah kan pawm ve thei lo a ni,” tiin Integrated Disease Surveillance Programme thawktute chuan an sawi.

Health Department hotute chuan tunhnai ah Aizawl khawpui chhung Veng hrang hrang ah Dengue natna a hluar mek thu sawiin, SVBDCP, Veng hrang hranga Local Council leh AMC Corporator tangho hmalaknain Dengue do beihpui thlak mek a ni tih an sawi a, Thosi pianna tihbo hnatlang leh khawl hmanga Thosi kah, Fogging neih thin a ni a, Fogging hi Veng 5 - Armed Veng South, Armed Veng, Saron Veng, Chhinga Veng leh College Veng-ah neih tawh niin kar tawp khan Zarkawt leh Tuithiang Veng-ah neih tan leh a ni.

Health Department hotute chuan kumin ah ruahtui a tlak rei avangin Dengue thehdarh theitu Thosi pian theihna tui tling a tam avangin Dengue natna hi a hluar phah niin a lang tih an sawi a, Dengue natna awm duh hun lai a nih bawk avangin mipuite fimkhur turin an chah a. Dengue natna laka inven nan an In leh a vela Thosi pian theihna pangpar pot-a tuitling, Tyre chhia, Dispo Cup, Bottle ruak ang chi tibo tur leh Thosi thahna hlo chhit chi hmang thin turin an chah a. Dengue chu thihpui theih natna a nih avangin he natna vei ni-a inringhlel te chu thisen endik tir vat turin an chah bawk.