Tuipui khua ah ‘Tomato Kut’ hman a ni

Khawzawl-a Horticulture Department leh Tomato Grower's Association, Tuipui tang-kawp buatsaihin nimin khan Tuipui khua ah ‘Tomato Kut’ hman a ni a, Horticulture Development Board-a Vice Chairman, Prof. F. Lal-nunmawia, MLA chuan khuallian niin a hmanpui a ni.

Tomato Kut hmanna ah hian Horticulture Development Board-a Vice Chairman chuan Tuipui khua ten Tomato Kut an huaihawt hmasak ber hmanpui tura an sawm chu vannei a in tih thu sawiin, Mizoram in kan ei nasat tak Tomato hlawhtling taka Tuipui khuain a rah an seng thin chu lawmawm a tih thu leh, Tomato mai bakah Tomato atanga siam theih dangte siam kawngah tan lak a ngaih thu a sawi a. Sawrkar flagship program SEDP hmangin thei leh thlai tharte tihpuna theihtawp chhuaha intodelh tum a nih thu sawiin, State pawn atanga lakluh thlai tam tak te titawp turin hmalak anih zel dawn thu a sawi.

Tuipui khuaah hian kum 2013 atang khan chhungkaw tlem te in Tomato an ching tan a, kum 2015 khan KVK Khawzawl  chuan Arka Rakshak Variety a enchhin atangin a that duh zia hmuh a ni a. Kum 2016-ah Tomato Grower’s Association in din niin, DRDA Champhai-in a kalpawhna kawng a sial sak a. Kum 2017 khan Horticulture Department-in hlawk zawka thar thei tura hma lain, Arka Rakshak mai bakah Arka Samrat Variety-te chin chhoh a ni a. Kumin 2019 hian tun thlenga thar tawh chu Grade A quintal 1200 leh Grade B quintal 480 niin, Rs. 57,00,000/- an lei tawh a, chhungkaw 65 ten zau hrang hrang 5-ah Tomato an ching mek a ni.

Tuipui khuaa Tomato chingtute hian kum 2017 atanga tun thleng hian Tomato hi Grade A quintal 3073, Grade B quintal 1229.2  thar tawh niin, heng zawng zawng atang hian Rs. 1,59,38,000/- lei tawha chhianchhiah a ni.