House-ah ramri sawiho

Home Minister, Lalchamliana chuan Mizo-ram sawrkarin Official-a Mizoram ramri a pawm chin chu Mizoram leh Assam ramri-ah Bengal Eastern Frontier Regulation 1873 hmanga Inner Line Notification August ni 20, 1875 a siam nih thu leh Mizoram leh Tripura, Manipur, Myan-mar leh Bangladesh ramri-ah Bengal Eastern Frontier Regulation 1873 hmanga Inner Line Notification, March ni 9, 1933 pawm a nih thu a sawi.
Nimin a Assembly Session zawhna leh chhanna hunah he thu hi Home Minister chuan a sawi a, zawhna neitu Congress Member, Zo-dintluanga zawhbelhna chhangin ramri humhalh turin sawrkarin ruahmanna a siam thu leh, sawrkar hmasa atangin tun thlengin Core Committee-in hma an lak mek thu a sawi a. Kumin July 22-a Chief Minister in ramri buai chinfel kawngah strategy mumal tak an neih tawh thu a sawi chu Chief Minister thu lo chuan a puan theih loh thu in a chhang bawk.
Rorellai Member, Lalrinsanga Ralte zawh belhna pawh chhangin Home Minister, Lalchamliana chuan sawrkar hmasa hunlai ah pawh Boundary Commission din ala nih loh thu leh ramri zir-chiang tur erawh ruat an nih tawh thu a sawi a. Sawrkar hmasaah khan Core Committee din anih thu leh sawrkar thar alo pian khan Re-Constitute a nih thu sawiin, “Chief Secretary hovin a khat tawkin an thukhawm reng a. Ramri chung-changah Assam nen emaw, India sawrkar hnuaiah sawiho dawn ila ‘Enge kan tanchhan ang’ tiin document pawimawhte khawn khawm a ni a, an zo deuh thuak tawh nia hriat a ni,” a ti.
Dr. Vanlaltanpuia'n Mizoram-Assam ramri-ah tunhnaiah Indo-Tibetan Border Police te leh BSF te duty angin chanchinthar-ah a hmuh thu a sawi chu Home Minister chuan Indo Tibetan Border Police te leh BSF te chu Mizoram leh Assam ramri venga duty ni lovin Assam-a NRC kaihhnawiha duty nia hriat a nih thu a sawi bawk.

Comments

Chhiar Hlawhte