YMA in Ram leh Hnam humhalh chungchangah Mizo mipui kan harh thar tul an tih thu an sawi

Serchhip Sub-Hqrs. YMA Kumpuan Committee chuan ram leh hnam humhalhna kawng hrang hrangah Mizo mipuite kan harh thar a tul hle nia an hriat thu sawiin, a bik takin sumdawnna chungchang leh ILP chungchangah mipui te kan harh thar a tul nia an hriat thu an sawi.

Serchhip Sub-Hqrs. YMA Kumpuan Committee hruaitute chuan nimin tlai khan Serchhip Bazar-a Sub-Hqrs. YMA Meeting Hall-ah thuthar thehdarhtute kawmin YMA Kumpuan atana kum 13 zet an lo hman tawh, 'Ram leh Hnam humhalh' chungchanga hma an lakna te an sawi a. He hun hi Serchhip Sub-Hqrs. YMA Vice President leh Kumpuan Committee Chairman ni bawk, Lalzuiliana chuan kaihhruaiin Serchhip Sub-Hqrs. YMA President, R. Sanghmingthanga chuan Serchhip Sub-Hqrs. YMA leh Serchhip-a thuthar thehdarhtu ten thawhhona tha tak an nei thin leh an hmalakna te zau zawka an puanzar sak thin chu lawmawm an tih thu a sawi a. 'Ram leh Hnam humhalh' chu YMA ten kum 13 zet Kumpuan atan an lo hman tawh thu leh amaherawh chu hmalak zui zel ala tul thu sawiin, Sumdawnna kawnga inchimralna chu Hnam inchimralna awlsam ber a nih avangin hemi kawngah hian YMA chuan nasa taka hma an lo lak tawh thin thu leh ram leh hnam humhalhna kawnga hma an lakna a nih avangin theihtawp chhuaha hmalak zel an tum thu a sawi a. He an hmalakna avang hian Serchhip khawpui chhunga hnamdang dawr thenkhat te tihtawp a nih tawh thu leh Thenzawl-ah pawh dawr pakhat chu dan lova sumdawng an nih avanga tihtawp a nih tawh thu an sawi.

YMA hruaitute chuan ILP chu kan Hnam tan 'Dan Rangkachak' a nih thu sawiin, amah-erawh chu Mizo mipuite bawk hi a hmang diklo leh a bawhchhia te an nih zawk thin thu an sawi a. Police leh YMA ten Dan lova hnamdang awm leh phalna nei lova Mizoram-a awm te dap-chhuah hna an thawh apiangin man tur an awm ziah thu leh heng mite chhan tum Mizo an awm ziah thin thu an sawi a.

Mizo mipuite hian kan hna thawk turin hnamdang te ILP kan sponsor theih laiin mahni hna thawk tur nilo a lo sponsor thin an awm thu leh mahni sponsor nilo lo rawih ve chu Dan bawh-chhiatna a nih thu YMA hruaitute chuan sawiin, ILP sponsor-tu te pawhin an hna thawk tura an chhawr te chu an chhawr zawh hnuah an ILP titawpa an thawnhaw tur a nih laiin lo Se zawl chhuah mai an awm thin thu leh hei hi Dan bawhchhiatna leh kan Hnam tana thalo a nih thu an sawi a, heng hnamdang zingah hian sualna danga inhnam-hnawih te pawh an awm zui thin thu an sawi bawk.

Hei bakah hian YMA hruaitute chuan hnamdang nena nupui/pasal inneih kawp avanga harsatna an tawh thin thu pawh sawiin, hnam-dang zingah Mizo hmeichhia pasal neih avanga sumdawnna kalpui tum te pawh an awm thin thu leh hei hi Dan phalloh nia an hriat thu an sawi a. Hnamdang thenkhat ten Mizo hmeichhia te chu 'sumdawnna Permit' ah hmangin nupui-ah an nei emaw tih mai tur te pawh a awm thu sawiin, hemi kawngah hian nasa zawka inzirtir a pawi-mawh thu leh Dan hnuaiah ngei sumdawnna an kalpui theihna tura hmalak zui zel an tum thu an sawi bawk.

YMA hruaitute chuan sumdawnna-ah Mizo leh Mizo kan indawr thin a pawimawh thu sawiin, Mizo leh Mizo kan indawr hian kan sum chu kan khawtual-ah a len zui theih laiin hnamdang kan dawr hian kan sum chu rampawn ah a luan-chhuah thin thu an sawi a, hemi kawngah hian Mizote kan thanharh zel a pawimawh thu an sawi.

Nimin a Serchhip Sub-Hqrs. YMA Kum-puan Committee hruaitute ten thuthar thehdarhtute an kawmna hunah YMA Sub-Hqrs. Kumpuan Committee hruaitute bakah Sub-Hqrs. YMA OB te telin Kumpuan chungchanga an hmalakna hrang hrang kalpui zel dan tur leh an hmachhawp te sawiho a ni bawk.