Puducherry Zirzin Diary

Puducherry Zirzin Diary

- C.Ramengmawia, Editor Lamkal
Information & Public Relations Department, Govt. of Mizoram buatsaihin tun thla, Nov. 9-15 chhung khan I&PR Official 3 leh Mizoram Journalist Association member mi 9 ten India ram Chhim lam- Puducherry leh Chennai-te kan zuk tlawh a, kawng hrang hrangin a hlawk thlak hle.
Ni 9 : He Press Study Tour-ah hian Aizawl atangin chanchinbumi te 5, Kolasib District, Siaha District, Lunglei District leh Serchhip District atangte in chanchinbumi 1 theuh kan kal a. Chawhma dar 11:00-ah I&PR Director Office-ah I&PR Minister Pu Lalruatkima Ralte hovin inkhawm tawi neih a nih hnuah Minister hian min vai liam ta a ni.
Lengpui Airport atangin chawhnu dar 3:00-ah chhum chhah tak karah chhuakin, tluang takin dar 5:00-ah Kolkotta Airport kan thleng a, kan ruahman lawk angin he Airport atang hian Chennai thlawk leh nghal tur kan ni a. Amaherawhchu, Cyclone Bulbul khan Kolkatta leh a chhehvel a lo nuai tan mek avangin Emergency-in Airport chu zan dar 6:00 atanga a tuk zing dar 6:00 thleng khar a ni ta rup mai.
He Airport atanga India ram State dang leh Foreign thlenga Thlawhna zawng zawng cancel a nih avangin kan buai ta luih luih a ni ber e. Keini pawh Kolkatta-a riak tura inruahmansa kan nih loh avangin kan hotu ten chawpchilh takin riahna tur an zawng a, Salt Lake Mizoram House-a thawktu ten min lo dawngsawng thei dawn ta. Amaherawhchu, Airport atanga kan thlen In panna tur lirthei hi hmuh a har ngang mai. Cyclone a tleh mek avangin hmun hla deuh leh tih phei chu Taxi, Ola, Uber driver ho an tlan ngam si lova, engtin tin emaw ni lirthei hi nei thei hramin, kan thlen In-ah hian zanlai dar 12:00 dawnah kan thleng ve thei hram a ni.
Ni 10 : Zing lamah boruak pawh a lo ziaawm tawh a, kan hotu ten Chennai Thlawhna chhuak a awm thei dawn em tih an han ngaihven leh ngial pawhin Thawhtanni thleng pawha a la awm loh avangin kan tum ram panna hnuk hnai ta ber, Kolkatta-Port Blair-Chennai thlawhna chhiah a awm avangin he hun nghak hian Kolkatta-ah hian Pathianni kan hmang ta a ni.
Ni 11 : Zing dar 9:00-ah khaw duai tak hnuaiah Kolkatta Airport atangin Chennai, Puducherry lehluh turin Andaman & Nicobar Island khawpui, Port Blair kan pan a, darkar 2 hret kan thlawh hnuin Port Blair hi kan thleng leh ta a. Darkar 3 dawn kan awm hnuin Chennai hi tlai dar 4:00 velah kan thleng leh ta a. Chennai Airport atang hian motor hmangin chawlh lawk pawh awm hauhvin Puducherry hi kan pan lehnghal a, kawng lakah zanriah kan ei a, darkar 3 chuang kan tlan hnuin kan tum ram Puducherry hi kan thleng ta hram a ni.
Andaman & Nicobar Island hi thliarkar tih takah an lian lo hle a, an Airport-te pawh kan Lengpui Airport-te nen an inkhing tawk hmel viau.
Ni 12 : Hemi Ni hian Puducherry (Pondicherry a hming hlui) a hmun hmingthang leh pawimawh hrang hrang- French ho sulhnu hrang hrang zing ami Auroville (Earth Temple) Musuem leh Paradise Beach te kan tlawh a ni. Puducherry-ah hian an sawrkar Information & Public Relation (IPR) Dept. hotu ten min lo dawngsawng a. An Director MM. Vinayaraj sawi danin, an Journalist-te chu sawrkar-in pension a pek thu sawiin, journalist kum 20 thawk tawh, kum 58 tlingte chu sawrkarin pension a pek thin thu a sawi a.Thla tin Rs. 7500 sawrkarin a pe a, pension atan hian journalist-te'n contribution an nei lo. Journalist an thih chuan a chanve an nupuiten an lak chhunzawm thei a. Tunah hian pension la mi 11 an awm mek a ni. MM. Vinayaraj sawi danin, Accredited journalist-te chu sawrkar in Laptop leh Mobile Phone subsidy-a a lei sak thin bakah, sawrkar bus-ah a thlawna chuan an phalsak thin a ni. IPR Department-ah hian Section pali - Protocol, News, Publication leh Press a awm, thawktu 50-60 vel an awm a ni.
Ni 13 : Puducherry hmun hlui, hmun pawimawh tlawh lehin, an sawrkar tana sum laluttu ber Department, Tourism Department Director L. Mohammed Mansor hmuin Puducherry UT in khawvel hmun hrang hrang atanga khualpang zin (tourist) an hip khawm dan leh hmalakna hrang hrang te zawtin inkawmna hun tha tak kan hmang leh Tourism hmalakna documentary film hmuhnawm tak tak min thlir tir bawk.
Director L.Mohammed Mansor-a sawi danin, ram leilung Pathian dinsa humhalh chunga khualzinte hip chu an tum ber a nih hnu a sawi a. Mizoram pawhin in ram thing leh mau hausakna hmang khian khualzin inhip thei a ni, a ti a. An Department hmachhawp leh hmalak mekte chipchiar takin min lo hrilh bawk.
Puducherry atang hian Chennai-ah motor hmangin kir lehin, zan kan riak a. Chennai-ah hian Isua zirtirte zing ami Thoma martar-na hmun kan tlawh leh bawk a ni. Ni 14-ah Chennai atangin Kolkatta -ah zan kan riak a, Ni 15 khan tluang takin Lengpui Airport lo thlengin, hemi ni vek hian Serchhip ka rawn ban nghal nghe nghe.
Puduchhery hi Union Territory niin, 293 sq.Km a zau niin, mihring nuai 12.48 (2011 census) an cheng a, an zingah hian French mi khua leh tui nihna nei kawp mi 2000 vel an awm bawk. Tawng tuallengah Tamil, Telegu leh Malayalam an hmang. An sakhaw mipui ber chu Hindu niin, 83.39% an awm a. Christian-in dawtin 10.88% an awm a ni.
Kan cham chung leh vahvelnaah ruihtheih thil ti chu sawi loh, zuk leh hmuam ti hmuh tur an awm lova, a mi nawlpui pawh khualzinmite lakah an rinawm niin a lang a. Tin, kutdawha vak vel hmuh tur an awm lo bawk.

Comments

Chhiar Hlawhte