Entrepreneurship development ngai pawimawh

Commerce & Industry Minister Dr. R. Lalthangliana chuan Entrepreneurship Development chu sawrkar in a ngaih pawimawh thu a sawi.
Commerce & Industry Minister hian nimin khan Baktawng-a Chhuanthar Tlangnuam Carpentry Cluster Society hmun tlawhin bialtu MLA, Er. Lalrinawma kaihhruaina hnuaiah inkawmna a neihpui a, he hunah hian Minister chuan Baktawng in Carpentry project lian tak, cheng nuai 500 vel an hmu thei chu fakawm a tih thu a sawi a. “Tel, Mizo Cooker leh Aluminium works lam in siam thiam hle bawk a, theihtawpin SEDP atangin hma kan lakpui ang che u. Entrepreneurship development hi kan sawrkar hian a ngai pawimawh a, awswrkar hnathawh ringawt hi eizawn nan kan indaih tawh lo. Thiamna sang neilo tan pawh kut themthiamna hmangin eizawnna hlawhtling tak a neih theih a ni,” a ti.
Hemi hnu hian Commerce & Industry Minister hian Carpentry hmun, Sub-Centre leh Show Dust Breaqeting Plant a tlawh nghal a, hemi hnu hian Chhingchhip-a Food Park/ Juice Plant, thil hrang hrang siam chhuahna hmun hma enin, Chhingchhip PHC a tlawh nghal bawk.
Health Department changtu ni bawk Dr. R. Lalthangliana hian Chhiahtlang Sub-Centre chu tlawh bawkin tul leh mamawh an lo thlen te chu a tul anga hma a laksak tur thu a sawi bawk a. Hemi hnu hian Serchhip rawn thlengin Govt. Serchhip College-a Fly Over Bridge chu a hawng nghal a, hetianga College building leh building inkalpawhna tangkai tak siam a ni chu lawmawm a tih thu leh hei hian Motor Parking-a harsatna te pawh a sutkian a beisei thu a sawi bawk.
Hemi hnu hian Dr. R. Lalthangliana hian Serchhip Darnam Veng-a District Industry Centre chu tlawhin an dinhmun a en a, Thenzawl-a Handloom Complex hmunhma pawh a tlawh bawk.

Comments

Chhiar Hlawhte