Mizoram State Outstanding Entrepreneurs’ Award sem

Nimin khan Planning & Programme Implementation Department hnuaia Entrepreneurship Development Centre (EDS) buatsaih Mizoram State Outstanding Entrepreneurs’ Award sem a ni a, Home Minister Lalchamliana chuan khual-lian niin a hmanpui.

Mizoram State Outstanding Entrepreneurs’ Award semna HYVE, Aizawl City Hall, Tuikual South-a neih ah hian Home Minister chuan Award dawngtute chu duhsakna hlanin, Entrepreneur te hian chungkua engemaw zat eizawnna siamsakin, Mizoram mipui tan an thawk hlawk em em tih a sawi a, Mizoram in Statehood a neihna la reilo mah se, kawng tam takah hmasawnna a neih tawh thu sawiin, sawrkar hna hian mi zawng zawng a daihloh avangin mahni kut kawiha din tum chu thalaite tan thil tih makmawh a ni tawh tih a sawi a, hemi kawngah hian thalaite penchhuak zel turin a ngen bawk.
    Nimin-a Mizoram State Outstanding Entrepreneurs’ Award semna ah hian Mizoram State Outstanding Entrepreneur, 2019 chu C.B Lalliankhuma (CB Rice Cake) hnenah hlan niin Mizoram State Outstanding Women Entrepreneur, 2019 chu Laltanpuii (Zozia) hnenah hlan a ni a, Mizoram State Outstanding Entrepreneur, 2019 chu F.Hrangvela (F.Hrangvela Group of Industries) hnenah hlan niin Mizoram State Outstanding Entrepreneurs’ Lifetime Achievement Award chu Zonunsang Handloom leh Hming-liani Bakery te hnenah hlan a ni bawk.
    Award dawng tur hi tehna hrang hrang Business bultan dan, hmasawn dan, hnathawk chhawr zat, sum bul tan dan, lakluh zat leh sum dinhmun ah te teh a ni a, endiktu atan mi 5 ruat an ni bawk. Nimin a he hun hmanna ah hian Chief Secretary, Lalnunmawia Chuaungo chuan Mizoram-a EDS bul tan dan leh hma an lak zui dan te a sawi bawk