Aizawl Assam Rifles rama mimal LSC nei zingah mi 9-in LSC an surrender tawh

Aizawl-a Assam Rifles ram chhunga LSC nei zingah mi pakua (9) te chuan an LSC te sawrkarah an pekir (surrender) tawh.
Mizoram Legislative Assembly Session nimin a chhunzawma zawhna leh chhanna hunah C. Lalsawivunga zawhna chhangin Land Revenue & Settlement Minister Lalruatkima chuan, mi 9 in Assam Rifles rama an LSC neih sorkarah an surrender tawh tih House a hrilh a. LR&S Minister chuan Assam Rifles rama LSC neiten sawrkarah chhiah (tax) an pe emtih zawhna chhangin, “A thenin an pe a, mah se, a tam zawkin an la pe lo,” a ti a. 2019 Chapchar Kut hmannaa Chief Minister-in May thla hnu lam atang chuan AR Lammual leh a chhehvel Mizote ta a ni tawh ang tia a sawi angin Mizote ta a ni tawh em tih zawhna chhangin, “Assam Rifles hian Zokhawsang-a an hmun tur contractor hnen atangin an la dawn fel loh avangin Assam Rifles Lammual leh a chhehvel hi Mizoram sawrkar kutah dah a la ni lo,” tiin Minister hian a chhang a, Tun dinhmunah la insawn chhuak thei chiah lo mah se, an insawn ngei a ngai dawn tih sawiin, Mizoram sawrkar Councils of Minister-in AR rama mimal ram nei zawng zawng cancel tura ruahmanna alo siam tawh angin Department-in theihtawp chhuahin a bawhzui tih Minister chuan a sawi bawk.
Assam Rifles ram chhunga ram nei zinga an LSC sawrkara surrender tawhte hi Land Revenue & Settlement Minister hian House hriattir nghalin, chungte chu : Lalnunmawii, Baktawng; Lalzarliana, Bawngkawn South; Thanpari, Khatla; Dr. Sangzuala, Zarkawt; Rochhunga Ralte, Electric Veng; Lalhuthanga, Dawrpui Vengthar; Lalbiakliana, Chhinga Veng; K Sangnghaki, Bethlehem leh V Thlanga, Bethlehem te an ni.
Hetihlai hian, Aizawl-a Assam Rifles Battalion hmun pui, Lammual leh a chhehvel ram, Assam Rifles ten an luah reng laia LSC tam tak pek chhuah a nih thu ah LSC siamtute zawng chhuaka hremna pe turin Central YMA chuan Mizoram sawrkar a lo phut tawh a. March ni 11, 2019-a Central YMA Executive Committee Meeting chuan, dan kalha LSC pekte Cancel tura Cabinet Meeting-in hma a la chu lawmawm an tih thu an sawi a. Assam Rifles ten an chhuahsan tur ram hi mimal hnena pek leh sahthlak chu Central YMA chuan rem a ti ngai dawnlo tih sawiin, he ram hi Mizo mipuite tana thil tha leh rotling siam nan a tawp thlengin beih an tum tih an sawi a. Helai hmuna LSC neite chu an LSC kawl reng lova sawrkara pelet turin an ngen a ni. Hemi hma kum 2012 khan Joint NGO chuan Assam Rifles ram luaha mimal ram neite chu surrender turin an lo ngen tawh a. Hriat theih chinah AR ram luahah mimal ram nei mi 50 vel awmiin an hria a ni.

Comments

Chhiar Hlawhte