ZPM in Minister pahnih insawifiah turin an phut

ZPM |halaite chuan Central Jail tihchangtlunna Project-ah sum hman diklohna lian tak a awm nia a lan thu sawiin, hemi chungchangah hian Mizoram sawrkar-a Minister ni mek, R. Lalzirliana leh Robert Romawia Royte te chu insawifiah tura an phut thu an sawi.

Nimin a thu-chhuah an siamah ZPM |halaite chuan Nov. 26, 2019-a The Times of India chanchinbu chhuak chuan Ministry of Development of Northeast Region (MoDoNER) in Tanhril-a Central Jail tihchangtlunna atan December ni 29, 2014 khan cheng vbc. 13.07 pek a remtih thu leh he project sum sanction ni atanga thla 36 chhunga zawh tur a ni tih a tarlan thu tarlangin, “MoDoNER lam hian cheng vbc. 9.42 hi tum hnih (two installments) in December ni 30, 2014 leh November ni 16, 2016 khan an pe a ni. He hna thawk tur hian Pu Robert Romawia Royte ta, North East Consultancy Services (NECS) nen Mizoram sawrkarin inremna an siam a. He project atan hian Mizoram sawrkarin May ni 25, 2015 atanga October ni 13, 2017 chhungin cheng vbc. 10.46 IG (Prison) hnenah an pechhuak a ni,” an ti a. Chhuichianna in a tarlan danin June ni 23, 2015 atang chauhvin hna hi thawh tan a nih thu leh October, 2018, hna thawh zawh hun tura tih atanga kum 1 chuangah pawh thawh zawh la ni lovin he hnathawh CAG-in a chhuichianna ah hnathawh dan tur ruahman kalha thawh tam tak a awm tih hmuhchhuah a ni tih an tarlang bawk.

Hei bakah hian ZPM |halai thuchhuah chuan Record atanga a lan danin PWD Official ten Contractor Running Account Bill enfiah leh Countersign an tih duhloh avangin Technical sanction pawh lak a ni lo nia tarlangin, Department-in he hna hi hnathawh that dan tur intiamna (performance guarantee) awm lovin Contractor hnenah Work Order pe in hei hi CPWD Manual kalh tlat a ni tih an tarlang a. Auditors-te chuan Contractor-in Computerized Running Account Bills a siam tih leh, sum hmanna tichiang tur Measurement Book tel lovin IG (Prison) hnenah sum lakchhuah nan a thehlutin, cheng vbc. 10.44 lai pekchhuah a ni tih an hmuchhuak bawk tih tarlangin, Measurement book tello chuan cheng vbc. 10.44 hmanna hi a dik ngei em finfiah theih a ni lo tih an tarlang a.

He thilah hian CAG report atang hian Tanhril-a Central Jail sakna leh tihchangtlunnaah hian dan kalha thiltih a tam thu leh Corruption lian tak a awm ngeia a lan thu ZPM |halaite chuan sawiin, he project kalpui a nih laia Home Minister, R. Lalzirliana leh NECS neitu, Robert Romawia Royte, tun MNF Ministry-a Minister pawimawh tak leh thil tithei tak ni ta te thuneihna hnuaia hetiang thil a thleng chu thil pawi tak nia an hriat thu leh ram hruaitu ni tlak lovah leh innghahna tlak ni lovah ngaiin, hemi chungchangah hian insawifiah tura an phut thu an tarlang bawk a ni.