MPCC in Aizawl khawpui-ah Citizenship Amendment Bill, 2019 dodalna an lantir

Mizoram Pradesh Congress Committee (MPCC) chuan nimin khan Aizawl Vanapa Hall kawt-ah BJP kaihhruai sawrkarin kaltlangpui a tum mek, Citizenship Amendment Bill, 2019 dodalna hun an buatsaih.

Nimin-a MPCC in Citizenship Amendment Bill, 2019 dodalna hun an buatsaih hi MPCC Treasurer, Zodintluanga chuan kaihruaiin he huna thu sawitu MPCC General Secretary, John Siamkunga chuan Indian Citizenship Act, 1955 chu a that tawk thu leh kan ram, sakhaw hrang hrang, hnam hrang hrang kan him thin thu sawiin, Vawi 4 lai (1986, 1992, 2003, 2005) siamthat a ni tawh chungin, a tha zawnga siamthat thin a nih avangin ram mipuite dodal a hlawh ngai lo tih a sawi a. Tuna an siamthat tum danah hi chuan kan chhehvela Sakhaw hrang hrang zuitu tam tak awmte hi tihduhdah an nih chuan a lo lut apiang khua leh tuia kan pawm a ngai dawn tih sawiin, “Hei hi India ram mipuite, a bikin North East mipuiten kan himna tur a ni lo tih kan hria a, nasa takin kan dodal a. Heti chunga kaltlangpui an tum lui tlat hi hmangaihna vang a ni thei lo a ni. An kaltlangpui duh a nih pawhin Mizoram hi hrut tel ve suh se,” a ti bawk.
    He hunah hian MSU Gen Hqrs Vice President, J. Lalmuanzuala pawhin CAB dodal nan NGO-in theihtawp an chhuah tih sawiin, “Political Party-te pawhin kil hrang hrangah theihtawp an chhuah a. Tunah hian kan huanah Saichal a lo lut a, mu pui-a kan kahlet a ngai a ni. CAB dodal turin, Mizoram leh hnam a dinchhuah nan Mizoram mipuite i tangrual ang u,” a ti a. MZP General Hqrs. Vice President, Peter Chhangte pawhin MZP chu CAB duhlohna lantirna reng rengah tel zel an tum thu leh hmalak zel an tum thu sawiin, “CAB thatlohna te, kan ram leh hnam tana a himlohnate hi kan hrechiang vek tawh a, Mizoram sawrkar hian a tih tur a tih ve a ngai a ni,” a ti bawk.
    He huna tel te hian CAB duh lohna resolution pathum (3) chu lungrual taka pass in he Resolution hi Mizoram Governor hnenah an thehlut nghal bawk a ni.

Resolution :
1. BJP kaihhruai Central sorkarin India Parliament-a pass a tum, Citizenship Amendment Bill, 2019 hi sakhaw inthliarna (religious discrimination) hmanga India khua leh tui nihna pek theihna tur a nih avangin sakhaw zalenna (secularism) a palzut dawn a, chuvangin Citizenship Amendment Bill hi BJP sorkar hian hnuk kir rawh se.
2. Citizenship Amendment Bill, 2019 hi dan bawhchhia a India rama awm/cheng ru mekte India khua leh tui nihna pek theihna tur hmanrua a nih avangin Mizoram leh Northeast State dangte tan a him lo zual hle a, chuvangin Central BJP sorkar hian Citizenship Amendment Bill hi hnuk kir rawh se.
3. Northeast State mipuiten nasa taka an do, Citizenship Amendment Bill, 2019 hi BJP-in a pass lui dawn a nih chuan Northeast State-te huam tir suh se.