Mizoram-ah ruahman angin RMSA kalpui a ni lo

Comptroller and Auditor General of India Audit Report thar berah Rashtriya Madhyamik Shiksha Abhiyan (RMSA) kalpui danah Mizoram-ah thil felhlel a awm nual avangin ruahman anga tihpuitlin loh a ni.
Ningani kaltaa Chief Minister, Zoramthanga'n Assembly dawhkan-a a chhawpchhuah CAG Report-ah hian RMSA thiltum tarlangin, ‘Kum 2017-a mitin thleng phaka Secondary Education chhawphnaih’ tih a ni a. Chutiang a nih lai chuan Mizoram-ah kum 10 zet RMSA kalpui a nih tawh hnuah khaw awm zawng zawng 853 zinga khaw 392-ah Secondary School a la awm ta lova, hei hi za zela 46 zet a ni a. School Education Department hian zirchianna engmah a neih loh avangin Secondary School awmna khua a zirlai awm zat pawh an hre lo niin CAG report chuan a sawi a. Hei bakah hian a tul dan zir chiang hmasa lova in an sak tam tak chu hman tangkai lohvin a awm a, chu'ng zingah chuan Govt. Bawngkawn H/S-a Art and Craft Room te, Govt. Ch. Chhunga H/S-a Library Room te, Kulikawn H/S-a building leh Govt. KVM H/S-a Classroom tur an sak zawh tawhte a tel a ni.
RMSA hnuaiah hian Laboratory Assistant 58 lak a ni a, mahse, an thawhna tur Sikul building an la sak zawh loh avangin hun rei tak hna thawk thei lovin an awm a. Hnathawhna hmun tur nei lova Laboratory Assistant 58 lai lo lak lawk an nih avang hian an hlawh leh a behbawma cheng nuai 208.8 chu sen thlawn a ni. Ministry of Human Resources-in kum 2014 a kaihhruaina a siam angin Sikul thuneitute hian an sikul theuh ah tui thianghlim pekna tur an ruahman tur a ni tih a ni a. Auditor-te'n Sikul 92 zinga 15 an endik ah Sikul 10 chuan tui thianghlim in tur an nei lova, ruahtui dawhkhawl sawngbawl thianghlim loh an in avangin zirlai leh zirtirtute hriselna chu dinhmun hlauhawmah a awm nia tarlan a ni bawk.
Mizoram-ah hian naupang enkawl uluk ngai bikte zirtir turin Special Educator 42 lak a ni a. Sikul 309 dinhmun endiknaah sikul 53 chuan hetianga enkawl uluk ngai bik hi 5 aia tam kumtin an nei tih hmuhchhuah a ni a. Chuti chung chuan Special Educator 26-te chu naupang enkawl uluk ngaite zirtir hna thawhtir lova pisa lama chhawr daih an ni a. Sikul sak thar 15 zinga 9-ah chuan hetiang zirlai enkawl uluk ngaite kalna tur bik hi siam lovin In chhawng-ah te pawh rahka-ah an kal ve mai a tul a ni tiin report chuan a tarlang.
Secondary School 15 endikna ah chuan nikum March thla thleng khan a eng Sikul mah hi Information and Communication Technology hnuaia thuam an la ni lova. Computer dahna tur pindante chu siam ni ve bawk mahse computer, printer leh internet thlun zawm engmah a awm lo a. Hetianga RMSA kalpui a nih chhan hi Sikul tin mamawh dan khawnkhawm behchhana ruahmanna siam a nih thin loh vang leh hnathawh dan vil zui a endik a nih thin loh vang niin CAG report-ah hian tarlan a ni bawk.

Comments

Chhiar Hlawhte