Citizenship Amendment Bill tharthawh duhloh entirna atan Aizawl-ah Sit-in Protest neih a ni

India Parliament Thlasik thutkhawmin Citizenship Amendment Bill tharthawh leh a tum duhlohna lantirin North East Students Organisation (NESO) chuan North East hmun hrang hrangah nimin khan dodalna a ruala neih a ni a, Mizoram-ah pawh MZP bultumin Aizawl-a Vanapa Hall kawt-ah Sit-in Protest neih a ni.
Nimin-a Aizawl-a Citizenship Amendment Bill duhlohna leh dodalna lantirna hun hi MZP Vice President, Peter Chhangte chuan kaihruaiin he huna thu sawitu MZP General Hqs. President, B. Vanlaltana chuan Citizenship Amendmend Bill hi North East mi te mai nilo, Zofate tan a him lo em em tih sawiin, he Bill pass tum anih dodal nana Republic Day Boycott tum anih laia Mizoram sawrkarin a intiam tawh ang ngeiin a tih tur ti ve tura an phut thu a sawi a, “Central BJP Sawrkar hian he Bill hi a pass lui anih chuan Mizo thalai ten kan tihtur kan ti ve ang a ti,” bawk.
He hunah hian NESO Finance Secretary, Ricky Lalbiakmawia pawhin thu sawiin Citizenship Amendment Bill chu Hindu sakhua duhsak bikna Bill a nih thu a sawi a. “Kristian te nekchep tumna hmanrua anih avangin he Bill hi a hlauhawm hle a, ‘North East State’ hi duhloh paihkhawmna hmun atan emaw, Sakhua duhsak bik dahkhawm nana hman kan phal lo a, he Bill hi NESO chuan a tawp thlengin a dodal zel dawn a ni,” a ti a. Tunhmaa Mizoram Chief Minister in he Bill a lo dodal thinna chu fakin, tunah hian hma a la chhunzawm dawn em tih chu North East mipui ten kan thlir mek tih pawh sawiin, “Mahni Party leh mimal hamthatna dah thaa Ram leh Hnam himna turin he Bill hi min dopui turin kan ngen a ni,” a ti bawk.
Aizawl Vanapa Hall kawt-a Sit-in Protest neih ah hian MZP General Secretary, Lalnunmawia Pautu chuan MZP leh NESO ten a tir atanga CAB an dodalna hrang hrang a tarlang a, Sit-in Protest hman zawh anih hnu hian Governor hnenah hemi chungchanga Memorandum an siam chu an thehluh nghal a ni.

Comments

Chhiar Hlawhte