KTP General Conference thlen tur sawihona nei

Nimin chawhnu dar 2:00 khan kum 2020 KTP General Conference Serchhip-a neih tura Organising Committee Office Bearer te leh Ser-chhip-a Kohhran hrang hrang hruaituten Serchhip Kawnpui Kohhran Committee Room-ah inkawmhona an nei.

He inkawmhona hi Organising Chairman, Upa Vanlalchhunga chuan kaihruaiin Serchhip-a Kohhran hrang hrang hruaituten nena inkawmho an buatsaih chhan te sawiin, kum 2020-a KTP General Conference kan dawn tur chu Presbyterian Kohhran Thalai Inkhawmpui ni mahse Serchhip a Kohhran hrang hrang te kan thawhho a tul a ni tih sawiin, Serchhip-a Kohhran hrang hrang te chu inti neitu taka he khawmpui hi lo dawngsawng theuh turin a ngen bawk.

Upa Vanlalchhunga chuan KTP General Conference thleng tura Organising Committee lam inbuatsaihna te report a pe a, tun tum KTP General Conference lo awm tur chu sawrkar sum tibuai miah lova thlen an tum tih sawiin, hemi avang hian a tira Organising Committee lamin Budget head a lo siam tawh cheng nuai 70 pawh chu cheng nuai 60-ah tlakthlak anih thu a sawi bawk a. A tirah cheng nuai 70 budget siam anih dan sawiin, cheng nuai 50 chu Kohhran thawh-lawm leh Central KTP atanga tanpuina atanga hmuh beisei a ni a, a bak cheng nuai 20 chu sawr-kar-ah te inhlawhna dil a neih an rilruk thu a sawi a, mahse sawrkar lamah remlohna eng engemaw a awm tak zel avangin sawrkar hotute biak a kawng dang dap leh ai chuan Sawrkar tel lova khawmpui thlen mai chu Organising Committee ten an inhuam avang hian hemi tur hian ruahmanna an siam ta anih thu a sawi bawk.

He hunah hian Kohhran hrang hrang atanga lokal te pawhin thusawina an nei a, KTP General Conference dawng tur hian an inhawn thu leh thawhho zel tha an tih thu an sawi bawk.