FEMSE thilphut sawrkar in ala hre lo; Vawiin ah hna zawm vek turin a hriattir thung

Human Resources Development Board Vice Chairman, L. Thangmawia chuan Federation of Mizoram Samagra Employees (FEMSE) in nawrh an huaihawt chungchangah sawrkarin an thilngiat engmah a la dawng lo niin a sawi.
Human Resources Development Board Vice Chairman, L. Thangmawia hian FEMSE member-te’n Nov. 21, 22 leh 25 (ni thum chhung) sawrkar laka an thilphut nawr na'na chawlh an lak chungchangah Inrinni khan a Pisa-ah chanchinbumite kawmin Federation of Mizoram Samagra (RMSA & SSA) Employees (FEMSE) ten chawlh an la thut chuansawrkar a barakhaih takzet tih sawiin, FEMSE hian Mizoram sawrkar-a an thilphutte hi School Education Department changtu Minister-ah emaw, Chief Minister hnenah emaw an la thlen loh thu hi a sawi a, thlen pawh ni se tun dinhmunah SSA (Elementary) te hian Mizoram sawrkar chu an service chungchangah Gauhati High Court, Aizawl Bench-ah an khing mek a. Court thu kallai a nih avangin Court in a rel fel hma chuan an chungchang thu a hmalakna kal mek pawh sawrkar tan thutlukna engmah siam theih a la ni rih lo niin a sawi.
Human Resources Development Board Vice Chairman chuan SSA leh RMSA te Samagra Shiksha-a chhunfin an nih hnuin thawktute hlawh chu Central lam chuan a hma aiin an rawn ti tlem nia sawiin, an hlawh tur za zela 10-a lo do vena bakah an hlawh zat an lak theih na’n kum khatah Mizoram sawrkarin cheng Vbc. 27 a sen belh mek thu a sawi a. Sawrkarin zirna a ngaih pawimawh avangin Education Minister in theihtawp chhuahin Central lamin sum an rawn pek tlai tum pawhin state sawrkar sum lo hmang hawhin Mizoram Sawrkarin hlawh an lak theihna turin hma a lak sak zawk niin a sawi a. FEMSE hruaituten nawrh an huaihawt mek ah hian sawrkar chuan ‘Thawk lo chuan hlawh nei lo rawh se’ tih thupui a kalpui dawn tih sawiin, Sikul lam thuneitute hnenah pawh zirtirtu kal leh kal lo nitin a report tura hriattir an nih thu a sawi bawk.
Sawrkar in zirlai pawisawilo te hmakhua ngaiin FEMSE ten nawrhna an kalpui mek hi tihtawp nise a duh takzet tih sawiin Human Resources Development Board Vice Chairman chuan, November ni 25 (Thawhtanni) atang hian an hna chhunzawm vek turin zirtirtu zawng zawngte a hriattir nghal a. Sawrkar hriattirna zawmlo te chungah a tul ang zelin hremna kenkawh a ni dawn tih a sawi a. Mizoram sawrkar chuan FEMSE lungawilohna leh an harsatna te chu an hriatthiampui thu sawilangin, an chungchang chu tihfel thut theih loh, hun rei deuh ngai chi a nih avangin sawrkar dinhmun hrethiama lungawilohna an neih mekte chu titawp turin a beisei tih a sawi a ni.
Sawrkar laka lungawilohna neia nuar mek FEMSE member te hi Primary School zirtirtu mi 550 leh M/S zirtirtu mi 1643 an nih bakah High School 93 leh HSS 6-a thawk mek te an ni. 

Comments

Chhiar Hlawhte