Bialtu MLA in Silver Jubilee lawmna hmanpui

New Serchhip North Branch YMA chuan nimin khan an kum 25 tlinna, Silver Jubilee an lawm a, he hun hi bialtu MLA, Lalduhoma chuan khuallian niin a hmanpui a ni.
New Serchhip North Branch YMA in Zofa Run-a an kum 25 tlin an lawmna ah hian bialtu MLA, Lalduhoma chuan New Serchhip North Branch YMA in kum 25 an tling te chu a lawmpui thu sawiin Serchhip in hlawh-tlinna tam tak a neih te, Horticulture lama lawm-man pakhatna lawmman kan dawng te, faina intihsiaknaa pakhatna kan ni thei te chu lawm-awm a tih thu sawiin, hetianga hlawhtlinna chang khua bialtu MLA a ni thei chu lawmawm a tih thu leh Serchhip mipuite chungah a lawm thu a sawi.
Tunhnai maiah Serchhip in Mizoram pum huap hun pawimawh kan thlen tur chungchang te sawiin, a lo dawnsawn danah Serchhip mipuite kan tanrual a pawimawh thu a sawi a. A bial chhunga hmachhawp leh hmalakna hrang hrang sawiin, Chawmkai-a Lei dawh mek pawhtu kawng (Zote kawng) chu leilet paltlang kawng a nih avangin a pawimawh thu leh tun aia tha zawka kawngpui sial tura hma lak a nih thu te; Serchhip khaw hlui, Kawlri tlang tuaihnum leh khualzin hip thei tura hma a lo lak tawhnain hma a sâwn zel thu te a sawi bawk.
New Serchhip North Branch YMA Silver Jubilee lawmna hi an Branch YMA President, C. Vanlalauva chuan kaihruaiin bialtu MLA hian Jubilee hriatrengna lungphun chu a hawng a, Branch YMA Secretary, J. Vanlalruata hnen atanga Report ngaihthlak niin Organising Committee Chairman, Lalhrualiana bakah Serchhip Sub-Hqrs. YMA aiawh leh MHIP New Serchhip North Branch aiawh te atangin thusawi ngaihthlak a ni bawk.
New Serchhip North Branch YMA Silver Jubilee lawmna hi nizan hmasa atang khan neih a ni a, an Branch-ah tun dinhmun ah Member 280 an awm mek a ni.

Comments

Chhiar Hlawhte