Hunpui atan theihtawp chhuah a ni dawn

Home Minister, Lalchamliana chuan hunpui, Krismas leh kumthar lo thleng tur mipuite'n him tak leh thlamuang taka hun an hman theihna atan Police leh YMA-te'n theihtawp an chhuah tur thu a sawi.

Home Minister, Lalchamliana hian nimin khan Aizawl Press Club-ah thuthar thehdarhtute kawmin, kumdanga angin hunpui lo thleng turah Mizoram-ah boruak muanawm awm se an duh thu sawiin, “Mipuite thlangmuang takin awm thei se kan duh a ni. Kumin-ah pawh sawrkar phal loh Zu leh ruihhlo, halpuah, halmawi leh silai lem a mu kap chhuak theihte kan khap leh a ni,” a ti.

Hunpui lo thleng tur atan Central YMA hruaitute nen an inkawm tawh thu sawiin Home Minister chuan, “A rem remna ah duty indah a, zan lama patrolling-te uar deuh nise kan ti. YMA leh Police lamin duty dan turah ruahmanna an siam ang,” a ti a, halpuah, halmawi leh silai lem khap kawngah tum dang aia khauh an tum thu a sawi bawk.

Home Minister chuan Mizo mipuite chu thuawih thei tak kan nih thu sawiin, “Halpuah leh halmawi khap pawh kan zawm tha hle a, kum 2013-ah khawi atangin emaw hal a ni leh a, mipui rilru kha khan a tidanglam deuh a ni mai thei. Kumin ah chuan sawrkar lam atang chuan hal tum a ni lo,” a ti a. Zu leh ruihhlo avanga hnawksak man an awm chuan bail theihloh tura a theih ang anga ruahmanna kalpui an tum thu sawiin Home Minister chuan, Mizo mipuite thlamuang taka hunpui an hman theihna atan duhsakna a hlan bawk.