VC area tih tet remti lo

Serchhip-III Village Council huamchhunga VC, NGO leh Political Party hrang hrangte chuan Serchhip-III Village Council huamchin chu tihtet an remti lo tih an sawi.

Nimin zing khan Ser-chhip-III Village Council huamchhunga VC, NGO leh Political Party hrang hrangte chuan Lal-puithanga Hall-ah Joint Meeting neiin Serchhip Kawnpui South NGO Coordination in Serchhip-III huamchhung, Serchhip Bazar Hnuai-a In 33 te Serchhip-IV Area a dahlut tura hma an lak mek chu tha an ti lo hle tih an sawi a, Serchhip-III atanga Serchhip-IV indan tawh hnua VC-III huamchin tizim tur zawnga hmalakna chu a tawp thlenga dodal nise, he Meeting-a tel Seal nei ten chhu in DLAO ah hriattir nise an ti a. Hemi hma lam hian Serchhip-III VC Sitting pawhin an huam chin tihzim hi an rem tih loh thu hi an lo pass tawh bawk a ni.

Serchhip Kawnpui South NGO Coordination hian Serchhip Kawnpui South Branch YMA huamchin chu VC pakhat hnuaia an awm theihna tura hma lain sawrkar thuneitute hnenah an thlen a, Serchhip Bazar Hnuai bakah hian Ramthlun Veng, Serchhip-V VC huamchhung ami te pawh Serchhip-IV VC huamchhunga rinlut turin an ngen tawh bawk a, hei pawh hi Serchhip-V VC huamchhunga Political Party leh NGO te chuan rem an ti lo nia thudawn a ni bawk.