MJA member ten Zawlpui phai-a Fisheries Department hmalakna an tlawh

Serchhip District tlawha rawn zin MJA General Hqrs. hruaitute leh MJA Serchhip District Member te chuan nimin khan Serchhip Zawlpui phai-a Fisheries Department hmalakna hrang hrangte a hmunah an tlawh.
Nimin a Zawlpui phai tlawhtu MJA member te hi Serchhip District Fisheries Development Officer (DFDO), Zonuntluangi leh Serchhip District Fish Farmers' Association-a President, Hmangaihthanga ten lo dawngsawngin, Serchhip DFDO, Zonuntluangi chuan an hmalakna hrang hrang a lo hrilh a. Serchhip DFDO Office hi May 27, 2011 khan hawn niin tun dinhmunah DFDO hovin AFO 3, LDC leh peon 2 ve ve leh Driver leh PPO pakhat ve ve an awm a. Fisheries Department, Serchhip District hnuaiah hian Sangha Dil nei chhungkaw 1321 an awm tih sawiin, Sangha Dil siam theihna 750 Ha awmah Sangha Dil 395.685 Ha siam a nih thu a sawi a, Serchhip DFDO hnuaiah hian Cirlce 4- Serchhip, Thenzawl, Tuikum leh Hrangturzo Circle te a awm bawk a ni.
Serchhip DFDO chuan an Department-in Sangha khawitute hnenah Sangha chaw 50% subsidised-a a pek thin thu sawiin, Sangha Dil siam-a eizawng duhte tan hian Scheme hrang hrang atangin Sangha Dil siamsak an ni thin tih a sawi a, heng Scheme an kalpui te hi FFDA, RKVY, NFDB, Welfare of Fishermen leh Provision of Article 274 (I) hnuaiah te a ni tlangpui tih sawiin, heng Scheme zinga a tam zawk te hi tunhnaiah Scheme thar, Blue Revolution Scheme huaiah chhunkhawm a nih thu a sawi a. Heng Scheme hrang hrang hnuaia Sangha khawi tura tanpuina an pek, Sangha Dil neitute chu mi taima leh tih takzeta thawk an nih avangin an sum dawna Dil siam tur aia thain an siam deuh zel tih a sawi a, Department-in Sangha Dil neitu thenkhatte hnenah Sangha Chi siamna tur a din sakte pawh an tlawh nghal a ni.
Heng Sangha Dil hrang hrang an tlawhnaah hian nikuma Northeast Best Fish Farmer Award dawngtu, Hmangaihthanga, Serchhip Zozam Veng in ama ngaihtuah chhuahna hmanga a siam, Sangha Dil atanga tui luanchhuah dan Technology, MT Technology tia a hming vuah pawh an en nghal a, he Technology hmang hian Sangha Dil-a tui lut tam lutuk avanga Dil chhe thin leh Sangha chhuak thin te chu tih ziaawm theih a nih bakah Sangha Dil-ah hian mahni duhtawk zelin tui a dah theih tawh a ni.
Fisheries Department hian mimal Sangha Dil an siam sak bakah Dil intawm, Community Fish Pond te an siam a, heng bakah hian vantlang Tuikhur te siamin, Sangha mantu/khawitute chenna In te an sa a, Sangha chi siamna leh a note khawi lenna turte an siam bawk a ni.

Comments

Chhiar Hlawhte