‘Serchhip District Zofate Lairelna’ din a ni

Zoram Thar Executive Committee in khaw-vel pum huap Zofate Insuihkhawmna rorelna Inpui tur, Zofate Lairelna (Zofate Committee) an din hnuah Zirtawpni khan 'Serchhip District Zofate Lairelna' chu din a ni.
Zoram Thar Executive Committee hian Zofate Insuihkhawmna rorelna Inpui tur, Zofate Lairelna (Zofate Committee) hi tun thla ni 12 khan Aijal Club-ah dinin Zoram Thar puipate leh Executive member bakah Hnam hrang hrang atangin Hruaitu Chhangdawl (Vice President), Ziaktu (Secretary) leh Thurawnpetu (Adviser) ruat an nih bakah District tinah Coordinators te ruat an ni bawk.
Hemi hnu Zirtawpni khan Serchhip-ah pawh Zoram Thar hruaitu Dr. Zaichhawna Hlawndo kaihhruaina in Serchhip District Zofate Lairelna chu din ve leh a ni a, he hunah hian Dr. Zai-chhawna Hlawndo chuan Zofate hian hnam-a chianna tur pawh nei lovin kan awm a. British leh India ten hnam nihna (National Identity) pawh nei lovin min thendarhin min awp bet a. Tribal Identity hrang 25 lai min pe tawh a, chu nihna dik hmang chuan keimahni leh keimahni te pawh indovin kum tam tak kan lo awm a. Kan thlahtu pawh hre lovin kan bova, tunah chuan Zova thlahte kan nih in hre chhuakin Hnam-ah kan harh tan mek a ni, a ti. Serchhip District hi ramlai a nih avangin District Lairelna pawh din hmasak ber a ni tih a sawi bawk.
Serchhip District Zofate Lairelna-ah hian Lalawmpuia Renthlei chu Hruaitu niin Hruaitu Chhangdawl-ah Challianzinga Ralte (Chhingchhip); Ziaktu-ah Lalmuanzova Vuite (Chhingchhip); Ziaktu Chhangdawl-ah Laltanpuia Ralte (Then-zawl); Sum Vawngtu-ah T. Upa Lalhnema Bawlchhim (East Lungdar); Sum Ziaktu-ah Pachhunga Ralte (New Serchhip); Thurawn-petu te-ah Upa Lallawmzuala Hmar (Serchhip), Upa Thangthuama Hlawndo (East Lungdar); Laldingliana Ralte (Hualtu) leh Upa Vanlalhruaia (Biate) te ruat an nibawk.

Comments

Chhiar Hlawhte