Krismas hmaa MGNREGS hlawh pe turin phut

Mizoram Pradesh Congress Committee (MPCC) chuan thingtlang mipui nawlpui inhlawhna atana buatsaih, Ni Za Inhlawhna - Mahatma Gandhi National Rural Employment Guarantee Scheme (MGNREGS) hlawh chu hun rei tak Mizoram sawrkarin a pe thei tawh lo niin an sawi a, Krismas hma ngeia mipuite hlawh hi pe tura an phut thu an sawi bawk.

Inrinni-a thuchhuah an siamah MPCC chuan sawrkar in hun rei tak MGNREGS hlawh a pek theiloh chhan hi MNF sawrkarin sum leh pai a enkawl thiamloh vang leh, a tlaran zawng ringawta a khawsak zel vang nia an ngaih thu an sawi a. Khawzawl-ah chuan August thla atangin MGNREGS hlawh hi an la mumal tawhlo nia sawiin, August thla-ah ni 7, September-ah ni 14 leh October-ah ni 12 hlawhte lak a la ni lo niin an sawi a, hetianga sawrkarin mipui sum a bat sak mek lai hian District thar lawmna atan Job Card neite chu an ni khat hlawh theuh thawh tir an ni thung niin an sawi bawk.

Hei bakah hian Ngopa RD Block hnuaia mite pawhin September leh October thla chhunga an inhlawhna te an la la theilo nia tarlangin, Thingdawl RD Block hnuaia khaw thenkhat pawhin August thla atangin hlawh hi an lak theih tawhloh thu leh August-ah ni 12, September-ah ni 8 leh October-ah ni 6 hlawhte MNF sawrkarin a la batsak mek niin an tarlang a.MGNREGS hlawh la theilo te chu an lainat takzet tih sawiin, Kristiante hun pui ber Krismas hma ngeia pe turin MNF sawrkar an phut thu an tarlang bawk.