Assembly Thlasik thutkhawm zawhfel a ni

Mizoram Legislative Assembly 8-na thutkhawm vawi 4-na, ni thum awh chu tluang taka neih niin nimin khan zawhfel a ni.

Tun tum Assembly thutkhawm neih chhung hian House Member lo ni tawh, Thankima sunna hun hman a ni. House-ah report 9 thehluh a ni. Tun tum thutkhawm atan hian zawhna tawngka-a chhan chi 207 lutah 201 pawm a ni a, heng zinga 6 chu hnawl a ni a. List of Business-ah 60 dah niin House-ah 13 chhan a ni. Chhan hman loh 47 a awm a, Department chhan loh 5 a awm bawk. Zawhna ziaka chhan chi Un-Starred Question 22 a lut a, a vaiin pawm a ni. Zawhna 133 Starred Question-ah leh a ni a, Department chhan loh 4 a awm bawk. Paper 17 chu House-ah pharh a ni a, Sawrkar Bill 8 lut zawng zawngte pawm vek a ni a. Official resolution 1 awm chu tawngka hmanga vote lak a nih hnuah pawm a ni a, Session neih chhungin Calling Attention pakhat a awm bawk.

Assembly Speaker, Lalrinliana Sailo chuan Session chhung zawnga List of Business dah te harsatna awm lova tluang taka kalpui a ni chu lawmthu a sawi a, Lok Sabha leh Rajya Sabha bakah State dangte rorel buai tak tak ang lovin rilru inpawh tlang taka rorel kalpui a nih avangin House member zawng zawngte lawmthu a hrilh bawk. Member ten thahnemngai taka tha leh zung, rilru leh ngaihtuahna te hmanga thawhhona chuan rah duhawm tak a beisei thu a sawi bawk.