Latest News

Serchhip District-a PMAY-HFA hnuaia In sak tanpuina dawng tur thlirhona neih a ni

Nimin khan Serchhip-ah Pradhan Mantri Awas Yojana-Housing for All (PMAY-HFA) Screening Committee chu Serchhip District Bawrhsap kaihhruaina hnuaiah thukhawmin PMAY (Housing for All) hnuaia In sak tanpuina sem meka 2nd DPR-a tanpuina dawng turte thlan dan tur an sawiho.

He sawihona Serchhip DC’s Meeting Room-a neih hi Serchhip District Bawrhsap, Sangchhin Chinzah chuan kaihruaiin he hun hi bialtu MLA, Lalduhoma pawhin a hmanpui a. He thutkhawm ah hian Serchhip District Urban Development Officer (DUDO), Vanthangpuii chuan PMAY (Housing for All) hnuaia an hmalak tawhna te tarlangin, Serchhip Town bikah 1st DPR ah In sak tanpuina dawng tur mi 1012 atangin 1st Phase-ah mi 404 te tanpuina hmasa ber (1st Instalment) Rs. 60,000/- theuh pe tawhin mi 246 te hnenah 2nd Instalment Rs. 60,000/- pe leh tawhin 3rd Instalment Rs. 30,000/- pek tawh mi 53 an awm thu a sawi a. Tunah hian 1st DPR atanga 2nd Phase-a tanpuina dawng turte sum dawn tur hi an la hmuh loh thu leh reilote ah hmuh theih an inbeisei thu a sawi.
Hei bakah hian DUDO chuan tunah hian 2nd DPR hnuaia tanpuina dawng turte buaipui mek an nih thu sawiin, 2nd DPR hnuaiah hian mi 985 dawng thei tura pawm an nih thu leh an zinga mi 102 te chu chhan hrang hrang avanga paih leh an nih thu sawiin, heng mite hmunruak lo hnawhkhah dan tur hi he thutkhawm ah hian sawiho tura ruahman a nih thu a sawi a. 2nd DPR hnuaia tanpuina dawng turte sum dawn tur hi an la dawn loh thu leh tunah hian 3rd DPR pawh kalpui leh tan mek niin mi 532 te hnen atangin dilna an dawn tawh thu leh an zinga mi 79 te chu chhan hrang hrang avanga paih leh an nih tawh thu a sawi a. Hei bakah hian Thenzawl atangin 1st DPR-ah dilna 207 dawngin mi 24 te dilna hnawl a nih thu leh North Vanlaiphai-ah dilna lut 349 atangin mi 346 te tan sanction hmu tawhin mi 137 te chu 1st Instalment pek an ni tawh bawk.
He thutkhawm a tel te hian PMAY (HFA) hnuaia tanpuina dawng tur dik tak ten tanpuina hi an dawn theuh theihna turin 3rd DPR hnuaia tanpuina dil duhte tan thla thar December 15 thleng dilna thehluh hun hawn leh nise, kumin chhungin 3rd DPR hi siam hman tum nise an ti a, 2nd DPR hnuaia hmunruak 102 awm chu 3rd DPR hnuaia dilna thehlut te atangin hnawhkhah chhoh nise tiin, he ruahmanna hnuaia tanpuina dawng tura thlan tawh, document thehluh felloh avanga hnawl te chu a tul anga enzuia hmalak zui nise an ti bawk.
He huna tarlan a nih danin PMAY (HFA) hnuaia In sak tanpuina hi an chenna khua-a kum 5 tal lo khawsa tawh, In hmun nei-a In sa theilo leh In neisa tan pawh Assam Type kum 15 aia rei lo ding tawh te tan dil theih a ni a, tanpuina dawngtu chu mi harsa, kum khata cheng nuai 3 (thla khat-a Rs. 25,000/-) lalut phaklo an ni tur a ni a. |anpuina diltute zingah hian pianphunga rualbanlo, Hmeithai leh kum upa te chu duhsak tura tih a ni bawk.

Comments

Popular News (Last 30 Days)