Assembly-ah hlawh punna Bill putluh a ni dawn

Mizoram Legislative Assembly thutkhawm chu naktuk atang khian neih tura ruahman a ni a, sawrkar Bill 8 lut zingah Minister leh MLA-te hlawh tihpunna tur dan siamthatna putluh a ni dawn.
Assembly Secretariat atanga thudawn danin Assembly inkhawm lo awm turah hian Dan dinglai siamthatna tur Bill 8 putluh tura thehluh tawh a awm a. Heng zingah hian Minister, Speaker leh Deputy Speaker, Deputy Government Chief Whip leh MLA te hlawh tihpunna tura dan siamthatna chu putluh a ni dawn a. Official Resolution pakhat a lut tawh a. House chhunga tawngka a chhan chi zawhna (starred question) 207 lut tawhin ziaka chhan chi zawhna 22 a lut tawh a. House dawhkana dah tur sawrkar lehkha pawimawh 8 a lut tawh bawk a ni.
Thudawn danin a tirah chuan tun Assembly inkhawm hi thla ruk (6) dan-a neih ngei ngei a ngaih avanga koh ang chauh a nih laiin sawrkar lamin Dan siamthatna tur pawimawh tak tak an pekluh leh tak si avangin a pawimawh viau dawn a. Assembly inkhawm hun tura ni 3 bituk hi pawhsei a tul dawn leh dawn loh chu a la hriat rih loh ni a thudawn a ni.
Tun tum Session-a ngaihtuah tura Official Resolution putluh hi The Scheduled Tribes and Other Traditional Forest Dwellers (Recognition of Forest Right) Act 2006 paihna tur rawtna a ni a. Bill lut pakhatah chuan the Mizoram Public Demands Recovery Act, 2001 hnawlna tur a awm bawk ni a thudawn a ni.
Hetihlai hian Assembly House-a ZPM Legislature Party te chu ZPM Legislature Party anga an din a remloh thu hriattir an nih hnuah Legislature Party dang hming put an dilna chu tihfel ala ni lo nia thudawn a ni a, hemi chungchang hi mipui ngaihven a ni mek bawk a ni.

Comments

Chhiar Hlawhte