Hnam himna ngai pawimawh lo niin sawi

ZPM Media and Publicity Committee-a General Secretary, Lalmuanpuia Punte chuan Mizo Hnam party-a inchhal MNF sawrkar in Hnam himna a ngai pawimawh lo em em niin a sawi.

ZPM in nimin-a Aizawl-a an Office-a Chhung Inkhawm an neih ah Lalmuanpuia Punte chuan he thu hi sawiin Nov. 9, 2019 khan Kolasib District MJA te chuan Bairabi Rel Station-a ILP Counter tlawhin a function mumal lo tih an an zuk hmu tih a sawi a. Hnam himna chu a pawimawh thu sawiin, “Ram in hmasawnna ke chak taka kan pen dawn phei chuan a pawimawh lehzual a, sawrkar hian a ngai pawimawh hle tur a ni. Hetianga sawrkar hmasa hmalakna Bairabi Rel Station-a ILP Counter a function mumal lo hian sawrkar hmasa hmalakna MNF sawrkarin a ngaih pawimawh lohzia leh chhunzawm an hreh zia a ti langchiang hle a, MNF party-in hnam himna an ngaihthah zia a tilang chiang hle bawk a ni,” a ti.

Hei bakah hian Lalmuanpuia Punte chuan Assam nena kan ramri buai hi sawrkarin tih takzet in hma la se, political party ten inbeih nana hmang lovin mipui nen tha takin tawiawm ila, sawifel a harsat a rin loh thu a sawi a. Assam chuan Arunachal, Meghalaya, Mizoram leh Nagaland te nen ramri buai an nei vek tih sawiin, Aruna-chal, Meghalaya leh Nagaland nena an buaina khu anmahni Assamese hovin an chenchilh ram vek anih avangin an ui hle. Keini nena kan buaina Cachar erawh khu chu anmahni Assamese hovin a chen chilh ve loh, Assam ram pangngai anga an en ve loh, engtikah emaw Assam atanga la indang mai tura an ngaih, an sawrkar hnathawkte pawh an awm hreh em emna hmun a nih thu a sawi a. “Kan sawrkar hruaitute hian Assamese Leaders te khu kawmngaih se, Assamese feeling chhuak zawngin thil sawipui se, harsalo te in kan ramri buai hi a sawifel theih a rinawm,” a ti bawk.