Serchhip District-a Luidung humhalh tha YMA Branch 5 te hnenah chawimawina hlan

Fisheries Department chuan nimin khan Serchhip District chhunga luidung humhalh tha YMA Branch panga (5) te hnenah Social Welfare Department kaltlanga Article 275 (1) fund atangin chawimawina a hlan a, he hun hi Fisheries Minister, K. Lalrinliana chuan khuallian niin a hmanpui a ni.

Serchhip Auditorium-a luidung-a Sangha leh nungcha humhalh thate hnenah lawmman (Incentive Awards) hlanna hunah hian Fisheries Minister, K. Lalrinliana chuan YMA ten lui leh luidung nungchate hmangaih taka an humhalhna hian mipuite thinlungah rah tha chhuah zel se a duh thu sawiin, Serchhip District chhunga YMA Branch 30 zetin anmahni banphak chin lui te nasa taka humhalh nachang an lo hre chho zel chu thil ropui tak nia a hriat thu a sawi a. Luidung humhalhtu ten anmahni tanpuitu tur Dan fumfe kan nei tawk lo nia kan inhriat thin kha sawrkar chuan a hre reng a, tun Assembly Session hnuhnung berah khan Dan fel fai tak pass niin hei hian lui humhalhtute a tanpuia a tihchak an beisei thu leh a tul ang zela ennawn leh siam that te pawh a theih zel tura beisei a nih thu a sawi a. Mizoram in ei leh barah hmasawnna tur a la ngah hle tih sawiin, heng kan ram mamawh chi hrang hrang te hi SEDP atangin umzui a nih tur thu leh hmalak tum dan tlangpui pawh he hunah hian a sawi bawk.

Fisheries Department Director, F. Vanlallawma kaihhruai he hunah hian Khual Zahawm Fisheries Secretary, Thlamuana pawhin sawrkar in luidung humhalh tur te, Sangha khawi leh tharchhuah ti pung tura hma a lak thu te sawiin, sawrkar atanga Sangha Dil siamna tur tanpuina dawng zinga hma la thalo an awm thin thu leh mahni Sangha Dil siamna tura sum dawn pawh eiru a, a siam dan tur ang ni phak lova siam tum tlat an awm thin te chu pawi a tih thu a sawi a. Sangha khawitute chu mithiam, Department a thawk te rawn taima tur leh an thiamna te chhawr tangkai tum tura chahin, an Department a thawk te pawh Sangha khawitute pui tura an inpeih reng thu a sawi bawk.

He hun hi Mizoram sawrkar-a Veterinary & Fishery Board Vice Chairman, C. Lalmuan-puia pawhin Mizoram sawrkar in SEDP hnuaiah luidung humhalhna kawnga hmalak a tum thu a sawi a. SEDP hnuaiah hian tunlai thiamna hmang tangkaia hmalak tum a nih thu leh luidung humhalh chauh ni lovin tuikhuah te pawh siam belh tum a nih thu a sawi a, hemi kawngah mipuite tawiawmna a ngen bawk a. Adviser to Chief Minister, C. Lalram-zauva pawhin YMA ten luidung humhalhna kawnga hma an lo lak tawhna chu lawmawm a tih thu leh tun aia tam zawk Sangha thar tura hmalak zel a pawimawh thu a sawi bawk.

Serchhip District Fisheries Development Officer, Zonuntluangi chuan Serchhip District chhunga an hmalakna te tarlangin Serchhip District chu Mizoram pum entawntlak khawpa luidung humhalhna kawnga hma la hmasa a nih thu leh kum 1992 atangin Mualcheng khua chuan Varhva lui an lo humhalh tan tawh thu a sawi a. YMA te hian hlawh leh hamthatna dang beisei lova luidung humhalh hma an lak thu leh kum 2014-ah YMA Branch 7 te RKVY hnuaiah luidung an humhalh avanga lawmman hlanin kum 2016-ah Branch 2 an lo hlan leh thu a sawi bawk.

He hunah hian Serchhip Sub-Hqrs. YMA President, R. Sanghmingthanga pawhin kum 13 zet YMA in Kumpuan atana 'Ram leh Hnam humhalh' an hman chhungin luidung humhalh chu tha heh berte zing ami a nih thu a sawi a. Mizo-ram-a contract hna thawktu ten luidung-a lung an la nasa lutuk chu Mizote tan ala pawi thei dawn nia an hriat thu a sawi bawk.

Nimin-a he hun hmanah hian YMA Branch 5- Chhingchhip Venghlun (Tuikum), Bung-tlang Vengsang Branch YMA (Mat), Bung-tlang Chhim Veng (Tuichang), Hmunzawl (Tuichang) leh Ngentiang (Tuichang) te hnenah Rs. 30,000/-, thuziak leh Momento hlan an ni.