Sesah lui-a Lei dawh thar bialtu MLA in a hawng

MLA Fund-a hnathawh a tha tur a ni - Lalduhoma

Serchhip khawchhung Sesah Lui-a MLA Fund cheng nuai 7 senga mihring kal kaina tur Lei dawh chu nimin khan Serchhip bialtu MLA, Lalduhoma chuan hawngin, MLA Fund atanga hna thawh chu a tha tur a nih thu leh hna thalo ah chuan Completion Certificate pek a tumloh thu a sawi.

Serchhip Bazar atanga chhimlam, Sesah Lui-a mihring kalkaina tur Lei dawh thar hawnna hunah hian Serchhip bialtu MLA, Lalduhoma chuan kumin ah MLA Fund pekchhuah dan a mumal loh thu leh sum an dawn hun tura an beisei ah pawh an dawn theihloh thu sawiin, hei vang hian MLA Fund atanga hna thawh tura an lo ruahman pawh engemaw zat thawh theih ala nih loh thu a sawi a. MLA Fund an dawn hmasak berah mipuite tana pawimawh tur helai hmuna Lei dawh tha taka zawhfel theih a ni chu lawmawm a tih thu sawiin, he Lei hmutute pawhin cheng nuai 7 senga dawh ah chuan tha an tih vek a rin thu a sawi a. He hna thawktu ten khawtlang tana inpe taka mahni hlawkna um lova hna an thawk chu lawmawm a tih thu sawiin, hei hian mipuite leh MLA dangte tan pawh MLA Fund hman danah inelna thianghlim thlen se a duh thu a sawi. Tunhma lamah MLA Fund atanga hnathawh thenkhat, a Fund petute pawhin an enzui lemloh nia lang leh thawk thalote pawh an hauh ngailoh a awm thin nia a hriat thu sawiin Serchhip bialtu MLA chuan, MLA Fund chu eiral mai mai tur ni lovin hmasawnna hna thawhna tur a nih thu leh hlep neihna tur a ni lo tih a sawi a, MLA Fund hmanga hna an thawh chu a tha tur a ni tih sawiin, MLA Fund atanga hnathawh thalo ah chuan Completion Certificate pek a tum loh thu leh kan ram ah dik leh tha taka hna thawk duh an la awm tih lantir an tum thu a sawi a, MLA Fund atanga hna thawh dan leh sum hman dan chu langtlang taka kalpui tur a nih thu leh hna thawktute pawhin langtlang taka an thawh tur thu a sawi bawk.
Tunhnaia MLA te hlawh tihpun chung-chang pawh sawiin Serchhip bialtu MLA chuan MLA hlawh tihpun hrim hrim chu awmlo an ti ngawt lo ti sawiin, amaherawh chu tun dinhmun ah Mizoram in sum leh pai harsatna nasa tak kan tawk mek a, Treasury pawh sum pekchhuah theih zat bituk sak an nih thu a sawi a. Chu mai bakah tuna Mizoram sawrkar chu sawrkar kan neih tawh zinga hautak ber niin MLA zawng zawngte chu Minister Rank-ah dahin MLA fang pawh an awm tawhloh thu a sawi a. “Hetiang hi kan ram dinhmun a nih mek avang hian kan mipuite hi chawikang hmasa in, cheng nuai 3 te pawh hi sem phawt ila, chumi hnuah beng thar-in kan la ngaih-tuah dawn nia kan ti a ni,” tiin mipuite dinhmun thlirin MLA te hlawh tihpun chu tih chi-ah an ngailo tih a sawi a. A thu sawi ang nilo deuha beih a tawh thin thu pawh sawiin Lalduhoma chuan, tuna MNF kaihhruai sawrkar a din tirh-a General Purpose Committee (GPC) thutkhawm ah cheng nuai 15 man Motor lei rawttu ah amah chu puhin Media lamah thu thehdarh a ni chiam tawh tih a sawi a, hei pawh hi thu diklo a nih thu leh GPC thutkhawm a thu sawi thehdarh chungchangah pawh hian Assembly lam atangin FIR thehluh hial a nih thu a sawi bawk.
Nimin-a Sesah Lei dawh hawnna hun hi ZPM Serchhip Block Sr. Vice President, Lalchhara chuan kaihruaiin hnathawktute hnen atangin he hna an thawh dan report ngaihthlak a ni bawk a, he Lei hi Serchhip bialtu MLA, Lal-duhoma’n MLA Fund a pek cheng nuai 7 atanga dawh niin ft. 55-a sei leh ft. 5.8 a zau a ni a, he Lei hi Fur ruahtui tam lai pawha rinawm taka a awm theihna turin a ban khur pawh thuk tha taka laiin a ban hi Inches 22 bial-a lian a ni a, a Beam pawh Ft. 2 bial niin Hand Railing tha taka siam a nih bakah a lai-ah hian mipui thut chawlh theihna tur siam a ni bawk a, an hmuh phak china hmanraw tha ber ber an hman thu an tarlang bawk. He hunah hian NGO hrang hrang aiawhte pawhin thu an sawi bawk a ni.

Comments

Chhiar Hlawhte