Oil Depot leh Bottling Plant-ah hma la mek

Food, Civil Supllies and Consumer Affairs Minister, K. Lalrinliana chuan Bairabi-ah tuialhthei chhek khawlna, Oil Depot leh eirawngbawlna Gas thun khahna, Bottling Plant lian din tura hmalak mek a ni tih a sawi.
Assembly Thlasik thutkhawm neih zawh takah Congress member, Nihar Kanti Chakma zawhna kal zela MNF member, Lalzirliana zawh belhna chhanga he thu hi sawiin Supply Minister chuan, Vairengte-a tuialhthei chhekkhawlna neih mek chuan Mizoram mamawh a phurhru zo tawh lova, Bairabi-ah hmun zau zawk en tawh niin, hei hi Company lam pawhin tha an ti a, reilote hnuah tih puitling beisei a ni tih a sawi a. Mualkhanga Gas Bottling Plant awmsa pawh a lian tawk lova, kangmei chhuak leh harsatna dang thleng thei lakah a him tawk loh bawk avangin Bairabi hmunah vek Bottling Plant lian zawk siam tum a ni a. Hengte hi Rel luh theihna hmuna dah tur tih ni mah se, ram awl remchan a awm rih loh avangin kawngpui tha tak pawh tura siam phawt tum a ni a, chu hnuah Rail kawng chhun tura buaipui leh tum a ni tih a sawi. Hemi tihlawhtling tur hian Company lam nen pawh indawr reng a ni a, hmun pawh vawi 2/3 en ho a nih tawh thu a sawi.
Supply Minister chuan, mipuiten eirawngbawlna Gas an laknaah Subsidy lo let lo a awm a nih chuan Distributor leh Department hotute hriattir thin turin a ngen a. Mipuiten kawtkaia Gas an dawn theihna tur, Home Delivery System chu mipuiten an chanvo a ni tih an hriat a tul tih sawiin, hei hi mipuiten an rin ngam phawt chuan a thatna an hriat chhoh zel a beisei tih a sawi bawk.

Comments

Chhiar Hlawhte