Hnahthial-ah ropui takin Chief Minister hmuak

Hnahthial District tih changtlun zelna tura Deputy Commissioner hmunhma tur leh Sawrkar pisa hrang hrang dahna turte enfiah turin nimin khan Chief Minister, Zoramthanga leh Hnahthial bialtu MLA, Dr. R. Lalthangliana te chuan lehlangin Hnahthial an tlawh.
Hnahthial tlawhtu Chief Minister leh bialtu MLA te hi Hnahthial khawtlang chuan lo hmuakin Bazar kawn-ah anmahni lawmna inkhawm neih a ni a, he hun hi Hnahthial District Bawrhsap, Vanlalmawia chuan kaihruaiin tun sawrkar-a Hnahthial khua a tlawhna hmasa berah Chief Minister, Zoramthanga chuan Hnahthial khua in District an nei chu an lawm hle tih a taka a hmuh thu leh a lawmpui thu a sawi a ni.
Chief Minister chuan Hnahthial, Saitual, Khawzawl te chu an sawrkar hmasak tawp dawn lamah khan mumal takin an puang tih sawiin, “Kan sawrkar chhunzawm tak loh avangin a awm mai mai a, mahse kan han sawrkar tan tirh leh hian kan function dawn kan lo tih tawh angin hma kan la chho nghal a ni. Amaherawhchu District function hi vawilehkhatah a tih pup pup theih lova, Sawrkar pisa turte an inbunfel a ngai a, chutiang tur chuan Khawzawl leh Saitual District bakah Shinlung Hills Council (SHC) te pawh ka enfiah tawh a, tunah a tawp ber nan Hnahthial kan en leh dawn a ni,” a ti a. Heng District pathum te leh Shinlung Hills Council te tih changtlunna tur hi central sawrkar ah project an thehlut tur thu leh a rualtlangin an ti changtlung chho zel dawn tih a sawi a, “Rah tha tak a lo chhuah nan hmalak kan tum a, District hlawhtling taka siam kan tum a ni,” tiin Hnahthial chu hmun pawimawh a nih avngin a pawhtu tur inkalpawhna tha tak tak siam tum a nih thu a sawi bawk.
He hunah hian bialtu MLA leh Health Minister, Dr. R. Lalthangliana pawhin inthlan hmaa an sawi tawh angin bial hmasawn nan nasa takin a thawk dawn tih sawiin, “District tharah development a awm dawn a, in vannei ang,” tiin Hnahthial - Haulawng kawng siam mek chu a rang thei ang bera siam tum a nih thu leh Pangzawl atanga Lungmawi leh Chhipphir panna kawng pawh siam a ni dawn thu a sawi a. Hnahthial Damdawi In chu District Hospital pangngai angin kalpui theih a nih tawh thu pawh sawiin, Mizoram-ah Ayush Hospital pathum sak a nih dawn thu leh chung zinga pakhat chu Hnahthial-ah dah a nih dawn thu a sawi bawk.
Chief Minister leh bialtu MLA te lawmna hun hman zawh a nih hnu hian Council of Ministers thukhawmin Agriculture Science-a Diploma Course zir theihna tura a pawm thar, ITC Hnahthial leh KVK te chu Chief Minister hian a tlawh bakah Hnahthial DC leh Sawrkar Pisa leh Quarters awmna tur atana RD Department ram leh Rallang tlang ram te tlawhin Hnahthial hmarlam kawtchhuah tlangdung a enfiah bawk.

Comments

Popular News (Last 30 Days)

Serchhip DCSO sawn a ni