Keitum leh Hnahthial inkar NH. 54 laihzauh leh siamthat tur hna thawh tan a ni

National Highway-54, Aizawl to Tuipang laihzauh leh siamthat tur atan nimin khan Package No. 3 leh 8-a hna thawktu tur, Bhartia Infra Project Limited chuan a hnathawh tur hlanna leh bul tanna hun Rawpui-ah hmangin he hun hi Serchhip District Bawrhsap, Sangchhin Chinzah chuan a hmanpui a ni.

National Highways Infrastructure Development Corporation (NHIDCL) hnuaia Aizawl leh Tuipang inkara NH. 54 Double Lane-a laizau-a siamthat hna thawk tur hian inbuatsaihna kalpui mek zel a ni a, he hna thawk tur hian Company hrang hrang thlan niin Package 3 leh 8 thawk tur hian Bhartia Infra Project Limited hi thlan an ni a, Bhartia Infra Project Limited hian Keitum leh Hnahthial inkar (Package 3) leh Tuipang atanga Aizawl lam hnaih KM 40, Package 8 (ABCI nen an thawh dun tur)-ah te kawng laihzauh leh siamthat hna hi an thawk dawn a ni. Nimin-a he kawng laih bultanna leh hlanna hun hi Serchhip DC, Sangchhin Chinzah bakah Serchhip SP, R. Sathiyasundaram IPS pawhin a hmanpui a, anni bakah hian Serchhip-a sawrkar Department hotute, Company neitute, NHIDCL hotute leh Rawpui VC leh YMA te pawhin he hun hi an hmanpui bawk a ni.

Nimin a he kawng laihzauh tur bul tanna hunah hian District Bawrhsap hnenah hian Pangzawl leh Rawpui-a VC leh YMA te chuan he kawng laih tur chungchanga harsatna awm thei te an lo thlen a, Bawrhsap chuan he kawng laih tur atana compensate la tawh thenkhat tan an chenna In chhuahsana In thar an sak thenkhat chu kawng laihzauh tur atan ala hnawk ang tih a hlauh thu sawiin, he kawng laihzauh tur in a tihchhiat tur chin hi Vawiin atanga rin nghal tum a nih avangin hei hi lo ngaichang hram hram turin mipuite chu a ngen a. He kawng laihzauh tur atan hian Compensation pek nawn theih a nih dawn loh avangin an sum an sen thlawn lohna tura lo fimkhut turin a chah a ni.

Bhartia Infra Project Limited ten anmahni puala kawng siam hna an thawh tur, Keitum leh Hnahthial inkar (package 3) hi cheng vbc. 450 senga thawh tur niin nimin-a hna thawh tan a nih atangin thla 42 chhunga an hna hi thawh zawh tura ruahman a ni a. Tunah hian hnathawk tura inpeih tawhin an Base Camp-ah hian lei laihna khawl thahnem tak bakah thawktu 200 chuang an awm tawh a, tun dinhmunah an hna thawh tur huamchhungah hian compensation chungchang ah a ni emaw, thildang ah emaw harsatna a awm rihlo nia an hriat thu sawiin, tluang taka hna pawh an thawh theih an beisei thu an sawi bawk.