Mizoram Youth Commission (MYC) in bung thar kai a tum - MYC Chairman

Mizoram Youth Commission (MYC) Chairman, Dr. Vanlaltanpuia MLA chuan MYC in Mizo thalaite tan sipai leh hna hrang hranga an luhna tura hma a lak thu sawiin, MYC chuan bungthar kai a tum thu a sawi bawk.

MYC Chairman hian nimin khan Aizawl-ah a Office Chamber-ah thuthar thehdarhtute kawmin MYC hmalakna hrang hrang a sawi a, he hunah hian Mizo thalaite sipai-ah a tam thei ang ber an luh theihna tura hma an lak thu leh Pre-Recruitment Training te pawh buatsaih a nih thu sawiin, Indian Army Pre-Recruitment Training buatsaih nan hian MYC chuan Assam Rifles leh Vairengte-a CIJWS te thawhpuiin, kumdang zawng aia changtlung leh hmasawn zawkin September thla atang khan kalpui a nih thu a sawi a, Assam Rifles Brigadier leh CIJWS hotu, Maj. General te a sawipui thu leh tun sipai lakna kalpui mekah Physical Test leh Medical Test neih tawh niin Medical Test paltlang mi 97 awmin Referred mi 50 chuang an awm thu sawiin, heng result hi ngaihchan mek a ni tih a sawi a. Written Test hmachhawn tura tlingte chu nakum January thlaa Written Test an neih hma zawng Coaching pek zui an nih tur thu a sawi bawk.

Hei bakah hian IAF Garud Commando atan Pre-Recruitment Training pawh buatsaihin Recruitment neihna hmun, Guwahati-ah candidate te hruaiin a buaipui thin thu pawh MYC Chairman chuan a sawi a, kum 2019-20 hian MYC buaipuina hnuaiah Aldrin Lalbiakfela, Keifang leh R. Lalrinnunga, Dinthar te chu All India Merit-ah lang phakin Calling Letter an nghak mek tih a sawi.

Dr. Vanlaltanpuia chuan MYC in UPSC-IAS Coching lian taka hmalak chhoh a tum thu pawh sawiin, chumi atan chuan December 5 hian Consultation Meeting neih tum anih thu a sawi a, UPSC-IAS Coaching chu kum 2019-20 chhung hian kalphung thara thlak tum anih thu a sawi. UPSC leh India sawrkar hnuaia Competent Authority dangten hna hrang hrang Examination an buatsaih a tlingte, zirna sanga hlawhtling leh zirna tha zir thei tura inziaktlingte tan Incentive Cash Award Scheme pawh siam a nih thu sawiin, a thawh khatna sem tawh niin a thawh hnihna application dawn khawm mek a nih thu leh Dec. 20, 2019-ah Award hi sem tum a ni tih MYC Chairman chuan a sawi a. Cash Award hi Category hrang hrang 5-ah then a ni a, a sang ber UPSC Civil Service (Main Written) cleared, Indian Forest Servuce Examination Indian Economic/ Statistical Examination te nuai 5 a ni a, a hniam ber Category 5-naah chuan-ah chuan Rs. 30,000/- a nih thu a sawi. MYC Chairman chuan Mizo thalai hna zawng mekte tan a awlsam zawkna turin Job Portal Web Based leh Mobile Based a hman theih tur duan a nih dawn thu pawh sawiin, MYC chu bungthar kai tura inbuatsaihin chumi atana MYC Policy leh Road Map and Action Plan chu peih tawh a nih thu leh December 20 khian tlangzarh tum a nih thu a sawi bawk.