MJA Study Tour-a kalten report pe

Tunhnaia Chennai/Puducherry-a Press Study Tour neia kal Mizoram Journalist' Association member-te chuan nimin khan Aizawl Press Club Conference Hall-ah zin report an pe.

Mizoram sawrkar Information & Public Relations Department bultumin MJA member-te tan Press Study Tour chhawng 4-a buatsaih turin ruahmanna siam a ni a. A chhuak hmasa ber hian November 9-15, 2019 chhung khan Chennai leh Puducherry an tlawh a. He Team-a MJA atanga hruaitu, A Zotinkhuma chuan Union Territory zing ami Puducherry-a I&PR hotute leh Tourism department hotute nen an inkawm dan a sawi a. Kum 2003 atangin Journalist kum 58 tling tawh, kum 20 chhung eizawnna atana lo hmang tawh te hnenah thla tin Rs. 7,500/- pek an nih thu te; Journalist Pension dawng vanduaina tawka thi te chu an nupui fanaute hnenah thla tin an pension atanga a chanve Rs. 3,750/- pek an ni thu te an lo hrilh tih a sawi.

Heng bakah hian Puducherry sawrkar hian an state chhunga Accredited Journalist-te hnenah Laptop emaw, Smart Phone emaw lei nan Rs. 12,000/- an tumsak thu leh a bak chu he puihna dawngtu Journalist chuan ama sum atanga a tum belh thu te an lo hrilh tih a sawi a ni.

Tourism chungchangah a hlawhtlinna turin zau taka hma lak aiin mahni ram mila kalna leh hawi bik neih chu a fuh ber nia an hriat thu Tourism hotute hian an lo hrilh tih sawiin, an ni pawhin hmalakna felfai tak insawrbingna an neih thu an lo hrilh tih a sawi a. Puducherry Tourism Director sawi danin an ram sq. KM 492 ah hian kumtin ramdang atangin tourist 150,000 an nei ziaha chhut a ni a, ram chhung atangin nuai 15 vel nei ziah anga chhut theih a ni bawk. Tourism hi an sawrkar sum lakluhna hnar tha tak pakhat a nih thu a sawi a, kum khatah Tourism department budget hi cheng vbc. 50 a nih laiin cheng vbc. 400 chuang kumtin sawrkar ah revenue an chhunglut thung niin a sawi thu a sawi bawk.

Ani bakah he Press Study Tour-a IPR Officer kal, Andrew H. Lalremruata chuan an zinnaa sawrkar aiawhte an kawmna leh an thil tlawhte atanga Mizoram tana tangkai tur nia a hriat te a sawi bakah he Tour-a tel MJA member dangten report an pe ve bawk.

MJA President, Zonunsanga Khiangte chuan Study Tour-a kalte report atangin Mizorama kan sawrkarin tih ve theih reng tur a neih te kan lo tih loh a awm tih a lang tia sawiin, “Journalist-ten Study Tour an neihna hmuna kan tana tih ve atana tha nia kan hriat kan sawi leh rawtna kan thlente hian bawhzui leh ngaihsak a hlawh thui lo thin hle a, BADP sum ngei pawh hi tourist hipna atan hmang tangkai theih a ni tih State dangah kan hmu a ni,” a ti a. Mizoram-a Accredited Sournalist-ten sawrkar atanga facility an dawn chu a tam loin a beitham hle tih a sawi bawk.