MPCC in BJP sawrkar-a inghat ah MNF puh

Mizoram Pradesh Congress Committee (MPCC) Media Department Chairman, Lallianchhunga chuan, “MNF party innghahna ber chu Central-a BJP sawrkar chak tak leh chak lohah a ni,” a ti.
Nimin a Aizawl Congress Bhavan-a MPCC Friday Political Session-ah he thu hi sawiin Lallianchhunga chuan, BJP dinhmun chuan a ni telin tlakhniam lam a pan zel avangin MNF innghahna chu a nghing mek niin a sawi a. “Nov. 5 atanga Nov.25 chhung hian India rampumah 'BJP Hlawhchhamna Aupuina Programme' kalpui mek a ni a. BJP sawrkarah India ram economy dinhmun a tha lo hle a. Unemployment rate pawhin kum 45 chhunga a tawn san lai ber (chhiat lai ber) a thleng mek a ni,” a ti a. “Centre for Monitoring Indian Economy (CMIE) tarlan danin kumin chhungah thla ka ta October, 2019 kha Unemployment rate san ber thla a niin India ram economy dinhmun chuan hniamlam a pan zel a ni. Centre for Sustainable Employment (CSE) mi thiamte tarlan danin kumin chhung ringawtah pawh mi maktaduai 9-in an hna an chan hial a ni,” a ti bawk.
MPCC Media Department Chairman chuan, Goods and Services Tax (GST) atangin beisei ang chhiah an hmuh theih loh avang leh India ram economy dinhmun a tlakhniam zel avangin 15th Finance Commission hun pawhsei tum a nih thu sawiin, “National Crime Report Bureau (NCRB) buatsaih Report pawh kum engemaw zat an upbeh hnuin Nov. 8,2019 khan kum 2016 Report an tichhuak thei chauh a. BJP sawrkar hnuaiah kum 2016 chhungin loneitu mi 11,379 lai an intihhlum tih tarlan a ni a. Kumdang report-ah chuan loneitute intihhlum chhan tarlan thin a ni a,mahse BJP sawrkar hnuaiah loneitute intihhlum chhan chu thup tlat a ni tawh. NCRB Report danin Maharashtra-ah loneitu intihlum an tam ber a ni,” a ti bawk.

Comments

Chhiar Hlawhte