Lok Ayukta din hnuah thubuai 8 dawng tawh

Vigilace Department enkawltu Chief Minister, Zoramthanga'n Mizoram-ah Lok Ayukta din a nih atangin thubuai 8 dawn a ni tawh tih a sawi.

Nimin a Assembly inkhawm-ah ZPM member, Lalduhoma zawhna chhangin Zoramthanga chuan, Lok Ayukta-in thubuai a dawn 8 zinga 2 chu chhui zui tlak loh nia ngaih avangin tihtawp a nih thu leh a dang pakhat chu a kaihhnawih Department, Environment Forest and Climate Change-ah an lo zirchian turin thawn a ni a. A bak 5-te chu ACB chhui tir an ni tih a sawi. Zoramthanga chuan, Lok Ayukta-in thubuai a chhuina kawngah Investigating Staff an la neih loh avangin tun dinhmunah chuan thubuai an dawnte chu ABC chhui tir mai hin a ni, a ti a. Staff la dah kim loh leh an mamawte chu a theih ang anga ngaihtuah chhoh zel tum a ni tih sawiin, chak taka hna an thawh theih nan bawhzui zel tum a ni tih a sawi.

Mizoram-a Lok Ayukta din a nih chungchangah hian Speaker, Lalrinliana Sailo chuan, Central lama hotuten Chairperon-ah hnamdang dah an duh a. Chief Minister-in Mizo ngei dah a duh avangin Video Conference hmanga tum 2 an sawi ho hnuah IAS Officer chawl tawh, C. Lalsawta chu Lok Ayukta Chairperson atan ruat a ni ta tih a sawi a, Lok Ayukta Chairperson atan Mizo ruatna tura CM hmalakna chu faktlak a nih thu a sawi bawk.