Sawrkar sum tel lovin Serchhip in KTP General Conference 2020 dawn a tum

Nimin khan Serchhip Kawnpui Kohhran Hall-ah KTP General Conference 2020 Organising Comittee te thukhawmin, nakum-a KTP General Conference thlenna tur atana ruahmanna hrang hranga hmalak tawhna te report ngaihthlak a ni.

Nimin-a KTP General Conference Organising Committee thukhawm hian General Conference atana Budget a lo siam tawh thlirin KTP General Conference thlenna tur hian Budget cheng Nuai 70 siam a ni a, Kohhran atanga thawhkhawm cheng nuai 50 niin, hemi bakah hian cheng nuai 20 hi sawrkar lam atanga hmuh beisei a ni bawk a. Cheng nuai 20 hi sawrkar lam atanga hmu mai thei turin an inngaih laiin, an hmuh tumna lamah remchan lohna a awm thu report an dawn leh tak avangin Organising Committee thukhawm chuan KTP General Conference an dawnna turah hian sawrkar lam atangin sum leh pai lamah beisei neih tawhloh law law mai nise an ti a. Budget cheng nuai 70 an lo siam tawh pawh cheng nuai 60-ah tla thlain cheng nuai 10 hi Conference thleng tur Pastor Bial hrang hrang ten insem leh mai nise an ti a. Cheng nuai 10 hmuhna atan hian Additional Budget siamin Serchhip Pastor Bial in cheng nuai 4, New Serchhip Pastor Bial in cheng nuai 2.5leh Serchhip Vengchung Pastor Bial in cheng nuai 3.5 thawh leh nise an ti bawk.

Nimin-a KTP General Conference Ogranising Committee thukhawm chuan KTP General Conference an dawn turah Kohhran mipui te chu mahni phak ang tawka theihtawp chhuah theuh tura ngenin, Sub-Committee te pawh Budget tihhniam anih leh tak avang hian an sum hmanna tura ruahman te uluk taka siama renchem taka sum hmang turin a chah bawk.

Hei bakah hian KTP General Conference Organising Committee thukhawm hian KTP General Conference 2020 Serchhip in a dawn tur denchhenin Serchhip-a Mobile Service Provider hrang hrang te an service titha lehzual tura ngen nise an ti a, District chhunga Ui leh ar khuahkhirh turin District Magistrate ngen nise an ti a, Chhiahtlang to Lamchhip kawng la siam zawhloh chu siamzawh thuai anih theih nan sawrkar-ah ngen nise an ti bawk.

Serchhip in KTP General Conference-2020 a dawn turah hian Organising Committee chuan Sub-Committee peng hrang hrang 9 a siam a, Nov. 26 atanga Dec. 16, 2019 chhung hian Kohhran hnatlangin Pandal sak tum niin, Nov. 26 hian Pandal sak bultanna chu Conference thlengtu tur Pastor Bial 3 ten an nei ang a, a bak hi chu Kohhran mipui te a inchhawkin hnatlang neih a ni ang.