Deputy Chief Minister in Kolasib-ah Sports Complex thar a hawng

UD&PA Department changtu Deputy Chief Minister, Tawnluia chuan nimin khan cheng nuai 2268.43 senga sak, Kolasib Sports Complex, Project Veng, Kolasib ami chu a hawng.
Kolasib Sports Complex hawnna hunah hian Deputy Chief Minister chuan he Sports Complex sakna ah UD&PA Department in an tihtur chin ang te tha taka an zo thei chu lawmawm a tih thu sawiin, sum tam tak sengin a sak hna an thawh hnuah a enkawlzui lam pawh a mawhphurtu tur ten uluk taka an tih a beisei thu a sawi a. Ram changkang leh ram hmasawn tehfung pawimawh tak chu infiamna khawvela an dinhmun hi a ni fo thin tih sawiin, keini pawhin theihtawp chhuahin rual elna rilru dik nen tan kan lak tur thu leh Sports Policy siamin bul kan tan dawn dawn thu a sawi bawk.
He hunah hian Sports & Youth Services Minister, Robert Romawia Royte pawhin thu sawiin India sawrkarin Sports a ngaipawimawh thar em em a, National Education Policy tharah phei chuan Sports chu Curriculum pakhat angin a telh dawn tih sawiin, “School tinah Subject khat angin a awm tawh dawn a, Mizoram sawrkar pawhin nasa takin tan lak a tum a ni,” a ti a. Bialtu MLA leh Supply Minister, K. Lalrinliana pawhin he hunah hian thu a sawi bawk.
‘Sports Complex at Kolasib project’ tia vuah hi National Building Construction Corporation Ltd (NBCC) aiawhte leh UD&PA department Engineer ten a hmunah kal a an enfiah hnuah Detailed Project Report (DPR) siama Sawrkar Laipui-a Ministry of Urban Development-ah thehluh niin October ni 8, 2014 khan project hi pawm a nih bakah a sakna tur pawisa cheng nuai 2268.43 pawh sanction nghal a ni a, he project hi ‘10% Lump sum provision for the benefit of North Eastern Region Including Sikkim Scheme’ hnuai atanga hmuh a ni. Sports Complex sak hna hi NBCC Ltd. ten Central Government norms angin Tender an chhuah hnuah M/s Balajee Developers, Ghaziabad, UP chu thlan an ni a, anni hian February ni 15, 2015-ah hna tanin September ni 30, 2019 khan an sa zo a ni.
Sports Complex, Kolasib-ah hian Artificial Turf Football Ground (100mx65m) dah a nih bakah 8-Lane Synthetic running track awmin, Boxing Room, Gym Room, Office, mipui 700 thut theihna Gallery, mi 120 thut theihna VIP Gallery te awmin Gallery-ah hian chair dah vek a ni a. Heng bakah hian infiammite inthlakna leh chawlh hahdamna tur Room 8, Ticket Counter leh Guard Room (Main Gate sir ve ve ah) dah a ni bawk. Helai hmunah hian Car Parking pawh siam niin DG set (125Kva leh LT panel) dah a ni a, Field sir kual chhuak hian MS Fencing dah a ni a, track area-ah SS Railing dah a ni bawk.

Comments

Chhiar Hlawhte