Nimin thlengin FEMSE ten chawlh an la zui zel; Sawrkar in insawifiah turin ti dawn

Federation of Mizoram Samagra Employees (FEMSE) chuan a ni 3-na atan nimin khan sawrkar lakah lungawilohna lantir lehin Serchhip-ah pawh zirna In thenkhat te chu khar a ni.

FEMSE te hian sawrkar laka an thilphut tih hlawhtlin ngiata kar hmasa ah ni 2 chhung a huhova chawlh an lak hnuah nimin khan Mizoram pumah a huho in chawlh an la leh a, hei vang hian Serchhip District-ah pawh zirna In thenkhat chu khar a ni leh a. Thudawn danin Serchhip District-a FEMSE mi thenkhat te chu nimin chawhma lam khan Serchhip AOC Veng-a Education Office hnaih ah an thukhawm a, amaherawh chu Police ten venhimna hna khauh taka thawkin harsatna thleng a awm lo a, Office pawh dan pangngaiin an kal thei nia thudawn a ni.

Serchhip District chhungah hian Federation of Mizoram Samagra (RMSA & SSA) Employees (FEMSE) hi mi 158 awmin heng zinga mi 120 vel te chuan tun tuma lungawilohna lantir mek ah hian chawlh an la a, hetianga chawlh an lak avang hian Secondary School 5, Upper Primary School 2 leh Primary School 1 te chu zirna kalpui theih lovin khar a ni. Mizoram sawrkar in hriattirna a chhuah angin Education Department hotute chuan zirna In hrang hranga chawlh la te hi nimin khan Aizawl lama thuneitu sang zawkte hnenah an thlen bawk.

Hetihlai hian School Education Minister, Lalchhandama Ralte chuan nimin tlai khan Aizawl-a a Pisa-a thuthar thehdarhtute kawmin FEMSE te'n Zirna In-ah te leh an Office hna chawlhsana sawrkar kar nana a ruala chawlh an la thut mai chuan a barakhaih hle tih sawiin, “Mizoram hmun hrang hrangah Zirna In a chawl thup a, zirlai naupang rilru thianghlim tak takte an zirlai zir zawm thei lovin an exam thei lova, naupang bakah an nu leh pate thlengin rilru chi-ai tak puin an awm phah a, hetiang hi thleng lo se ka duh a, a pawi ka ti takzet a ni,” a ti a. FEMSE te'n sawrkar kar nana Resolution/Ultimatum an siam chu Nov. 8, 2019-a Chanmari YMA Hall, Aizawl-a inkhawmpui an neih tum ami a nih thu sawiin, “Heng an thil ngiat hrang hrang ziahna resolution hi Chief Minister emaw, ka hnenah emaw engmah Official-a inhriattirna a awm lo,” a ti.

Sawrkar-in a ngaih pawimawh em em zirlai naupangte hmakhaw ngai zo lova naupang exam ti khaihlak zawnga hma laa, sawrkar thu an zawm duhlo chu pawmzam harsa a tih thu Minister chuan sawiin, “Chuvangin Mizoram sawrkar chuan hreh tak chungin sawrkar thu zawmlo zirtirtute chungah 'action' a lak a lo tul ta a, phalna tel lova ni thum lai an chawlh chhung zawnga an hlawh hi pek an nih loh tur thu hriattir an ni tawh a. Hei bakah hian November 26 (Thawhlehni) leh ni 27 (Nilaini), 2019 atanga Sikul/Office kai duhlo chu sawrkar hmalakna ring tawklo ah ngaiin, he an hnathawh mekah hian tui tawklo leh thawk chhunzawm duh lovah sawrkarin a ngai dawn a, Show Cause Notice pek an ni dawn a ni,” a ti bawk.