A tha zawnga ram hmel pholanna atana Photography hmang turin Tourism Minister in a chah

Tourism Minister, Robert Romawia Royte chuan Photography chu a tha zawnga ram hmel pholan nan hmang tur leh a ti hmasawn zel tura tanla sauh sauh turin thlalatute chu a chah.
Mizoram School of Photography leh Photography Club of Mizoram buatsaih, MSP Photographic Salon vawi 2-na nimin a MSP Gallery, Upper Republic-a a hawnna ah he thu hi sawiin Tourism Minister chuan tunlai khawvel nunphunga bet tlat chu thlalak a nih thu sawiin, IT hmasawnna thang zelah sawrkar pawhin thlalak tel lo chuan hna a thawk hlei thei tawh lo, a ti a. Hmasawnna hna atana DPR buatsaih leh hnathawh zawh tawh tih chian nan pawh thlalak a tel zel a ngai tawh tih sawiin, hetianga thlalak phochhuah leh intihsiakna hi chhunzawm zel a, zau zawka hmarchhak leh India ram pum huapa mite an lo tel theihna tura buatsaih chhoh zel a pawimawh thu a sawi bawk.
Photographic Salon hi khawvel huapa thlalak lama intihsiakna, National/International Contest an neih thin dan zulzuia buatsaih thin a ni a, a duh apiang tel theihna, thlalak intihsiakna leh pholanna niin tun tumah hian mi 53 hnen atangin thlalak 127 a lut a, Colour Section leh Monochrome Section-ah te thenin heta a titha ber hnenah Award sum fai Rs.10,000/- leh Trophy pek ve ve an ni ang a. Hei bakah hian thlalak tha 15 thlanchhuah te chu Gold Award, Silver Award leh Bronze Award te pek an ni bawk anga. Photo Exhibition leh Contest hian November ni 30 thleng a awh dawn a, nitin chawhma dar 10:00 atanga zan dar 8:30 thlengin tlawh theih a ni a. Thlalak phochhuah te hi Exhibition neih chhung hian tlawm zawka lei theih a ni bawk ang.

Comments

Chhiar Hlawhte