Serchhip District-a Students Police Cadet Programme kalpui dan tur sawiho a ni

Nimin khan Serchhip-ah Students Police Cadet Programme-a District Level Steering Committee chu thukhawmin Serchhip District-a Students Police Cadet kalpui tawh dan leh kalpui zel dan tur an sawiho.
He thutkhawm Serchhip District Magistrate, Sangchhin Chinzah hova a Pisa-a neih ah hian District Magistrate chuan Serchhip District-a Students Police Cadet te hmalak tawhna chu lawmawm a tih thu sawiin, zirlai naupangte tan pawh tangkai tak a nih zel a beisei thu a sawi a. He thutkhawma an thu ngaihtuah turah pawh zirlaite hmakhua ngaihtuah chunga uluk taka ngaihtuahna seng turin he huna tel te chu a chah bawk.
He hunah hian Students Police Cadet-a Nodal Officer leh Member Secretary, PC. Laltanpuia, Addl. SP chuan Students Police Cadet nihphung leh an hmalak tawhna te tarlangin, he Project hi August 2, 2010-ah hawn a nih thu leh July 21, 2018-ah rampuma kalpui tura hawn a nih thu a sawi a. Mizoram-ah he ruahmanna hi kalpui a nih hnuah Serchhip District-ah pawh District Level Steering Committee chu Feb. 6, 2019-ah District Magistrate kaihhruaina hnuaiah dinin SP Office in Students Police Cadet kalpuina turin Marian H/S chu thlangin kumin Feb. 22 atanga hmalak a nih thu a sawi a, tunhnaiah State Level Monitoring Committee in Govt. North Vanlaiphai H/S chu Students Police Cadet kalpuina atan hian rawn pawm lehin tunah hian an dinhmun kimchang thehluh a nih tawh thu a sawi a. Student's Police Cadet-ah hian pawl 9 zirlai naupangte an tel thu a sawi bawk.
Hei bakah hian Students Police Cadet te tana hma an lak tawhna te pawh sawiin, Marian H/S a Student's Police Cadet te tan he ruahmanna kalphung inhrilhfiahna te, Anti-Drug Run leh signature Campaign te, Drill practice te, ruihhlo hmansual leh Dan leh hrai inzirtirna te leh Chhiatrupna lo thlen thulha hman tur hliam enkawl dan pawimawh zual inzirtirna te buatsaih a nih tawh bakah Police Commemoration Day hmanna-ah SPC te tel tirin, Serchhip Police Station tlawhpuiin an hnathawh dan te hrilhfiah an nih tawh thu a sawi bawk.
He thutkhawm ah hian kumthar lama an hmalakna turte duangin, Students Police Cadet kalpuina tur School thlan belh rihloh nise, Students Police Cadet te tan kawng tam zawkah inzirtirna zau zawka neiin mithiamte pawh sawm nise, Serchhip District Magistrate Office tlawhna hun remchang buatsaih nise tiin nakum January thlaa Republic Day lawmna-ah Marian H/S-a Student Police Cadet te Parade-ah tel tir nise an ti bawk.

Comments

Chhiar Hlawhte