Mizoram Assembly Thlasik thutkhawm tan a ni

Mizoram Legislative Assembly 8-na thutkhawm tum 4-na chu nimin chawhma dar 10:30 khan Aizawl a Assembly House-ah neih tan a ni a. Hun hmasa lamah MLA hlui, Oct. ni 5, 2019-a boral, Thankima sunna hun hman niin zawhna leh chhanna hun hman zui a ni.

Nimin a Mizoram Legislative Assembly thutkhawm hi Asembly Speaker, Lalrinliana Sailo chuan kaihruaiin he hunah hian hun hmasa lamah MLA hlui, Oct. ni 5, 2019-a boral ta, Thankima sunna hun hman a ni a, Chief Minister Zoramthanga, Dy. Chief Minister Tawnluia, Lalduhawma leh Zodintluanga ten Thankima chanchin an sawi a. Hemi hnu hian amah sunna atan ngawi rengin Member te an ding a ni.
Hemi hnu hian zawhna leh chhanna hun hman zui niin Serchhip bialtu MLA, Lalduhoma zawhna chhangin PWD changtu Chief Minister, Zoramthanga chuan Thenzawl - Zote Road chu conrete-a siam a nih thu leh Contractor chu Nayak Infrastructures Pvt. Ltd., Guwahati, Assam an nih thu sawiin, sum ruahman pawh cheng nuai 1204.25 a nih thu a sawi a. He hna hi nikum December khan thawh zawh tawh a nih thu a sawi a. Zawhna neitu bialtu MLA, Lalduhoma’n Thenzawl Kawn atanga Thenzawl Tualvungi Veng inkar kawng awmsa chu siamthat sak nghal tura Session hmasa lama alo sawi tawh leh beiseiawm taka Chief Minister in a lo chhan tawh khawih leh si loh chungchang chu Chief Minister chuan he kawng hi KM khat (1) vel chauh a nih thu leh cheng nuai 145 vel senga siam theih an beisei thu sawiin, hmalak mek a nih thu a sawi bawk.
MNF sawrkarin Zoram dung leh vanga kawngpuite a siamthat vek avanga lawmthu sawina Resolution House-a an pass hnu hun reilote chhunga kawngpui te a chhiat leh vek chhan C. Lalsawivunga zawh belhna chhangin Chief Minister chuan kawng te kha a chhe zual lai thawmthat a ni ber tih sawiin, “PWD lamin Road roller te an lo nei tam tawk lova, a thar chah a ni a, inthlan ten min nang chho a, ruah tui a lo tla leh bawk nen duhthusama tha leh tlovin kan siam thei rih lo a ni,” a ti bawk.
Labour, Employment, Skill Development & Entrepreneurship Minister Lalchhan-dama Ralte chuan, C. Lalsawivunga, MLA zawhna chhangin Mizoram Youth Commission (MYC) hnuaia Coaching Centre, Dinthar Venga din chu chhunzawm a ni tawh lo tih pawh a sawi a, he IAS Coaching Centre atan hian sawrkarin Rs. 300,61,300/- a hmang tawh tih sawiin, he Centre-a kal atangin IAS-ah tling an la awm lo tih a sawi bawk.

Comments

Chhiar Hlawhte