Sa-a Mizoram a intodelh loh vanga mipui harsatna thleng chungchang House-ah sawilang

Nimin-a Assembly Thlasik thutkhawmah Serchhip bialtu MLA,Lalduhoma chuan Sa-a Mizoram a intodelh loh vanga mipui harsatna thleng mek sukiang tura hmalak a nih theih nan Calling Attention Motion a pulut a. AH&Vety Minister, Dr. K. Beichhua chuan tunhnaiah State dang atangin Vawk hrisel tha talh tur 762 lak luh a nih thu House a hrilh.

Nimin a Assembly Session-a Motion putluh paha thusawiin Lalduhoma chuan, ramdang atanga ran lakluh a nih vangin ran, a bikin Vawk tam tak an thih phah a, chhungkaw engemaw zatin harsatna an tawh phah mek tih a sawi a. Hemi vang hian sawrkar chuan Myanmar atanga ran lakluh a khap hial a. Mizoram chu ran-ah a intodelh loh avangin mipuiten harsatna an tawk mek a, khaw thenkhatah phei chuan Vawksa lei tur a awm mang lova, Sa sat leh zuarten hralh tur an nei lova, hetiang harsatna thleng mek tiziaawm tur hian Myanmar atanga Vawk lakluh khapna hi hlih ni se, a duh duhin ran hi lalut se, hetihrual hian ran lakluhte chu ramri-ah an hriselna endik nise, tuna harsatna zualpui hi a reh theih a beisei tih a sawi. Lalduhoma chuan, ran-a Mizoram intodelh lohna, a bikin Vawk-ah tanlak a tul tih sawiin, Mizoram Sawrkar chu Sawrkar Flagship Programme, SEDP hnuaiah Vawk Farm lian tawk siam theite chu duhsak ni se, hetah hian Rulling Party sawi lovin MLA tinte chu an bial chhungah theuh hetiang ti thei awm hi zawng a, chung mite chu hma lak tir ni se tha a tih thu a sawi bawk.

Hemi chungchangah hian AH & Vety Minister, Dr. K. Beichhua chuan, Sa ah Mizoram a intodelh lo tih chu thudik a nih thu leh tuna Mizo-ram mamawh zaa 65 chu State pawn atanga lakluh a nih thu a sawi a. Hei hi sawrkar pawhin a vei a, Sa-a intodelh a nih theih nan ngaihtuahna pawh an seng nasa hle a ni, a ti a. Vawk natna PRRS chu kum 2013-a a len avangin Vawk tam tak a thi a, hemi hnu kum 2016, 2018-ah PRRS vang bawkin Vawk tam tak a thi leh a, hemi vang hian Myanmar atanga Vawk lakluh hi khap a ni ta hial tih sawiin, tuna khapna thupek awm avang hian mipuiten tuar rih deuh mah se, nakin zela Mizoram thatna tur leh intodelh theihna tur a nih avangin tuar hram hram turin mipuite a ngen a. Vawk lakluh khapna chungchanga mipui, NGO leh sawrkar thawhhona a that thu a sawi bawk.

Vety Minister Dr. K. Beichhua chuan hunpui Krismas lo thleng turah mipuiin Vawksa a harsatna an tawh loh nan sawrkar chuan hma lain, PRRS leh African Swine Fever natna laka him Vawk lakluh a nih theih nan Commerce & Industries Director hnenah phalna a dil theih tih pawh sawiin, AH & Vety Director hriatpuina in Vawk lakluh phalna hi dil theih a ni a. Tun thlengin mi 17-in Vawk lakluh hi an dil tawh a; Vawk 3845 lakluh phalsak an ni tawh a, Vawk 762 chu lakluh a ni tawh a, kumthar January thla thleng Vawk lakluh hi dil theih a ni, a ti bawk.