Science Exposure Tour-a kal te vailiam an ni

Kumtina Mizoram-a Class-XI Science zirlaite tana buatsaih thin, Science Exposure Tour chu nimin atang khan Mizoram Science, Technology & Innovation Council-te buatsaihin neih leh a ni a, naktuk thleng neih a ni ang.

Science Exposure Tour-a kal tur zirlaite hi nimin khan Directorate of Science & Technology Office, MINECO-ah Dr. R.K. Lallianthanga, Chief Scientific Officer chuan Tour hlimawm leh hlawkthlak tak nei turin a vailiam a. Hemi puala inkhawm tawi neih ah Dr. RK. Lallian-thanga chuan he Tour Programme hi National Science Day 2019 lawmna kal zel puala buatsaih a nih thu a sawi a. Science zirna lamah chuan a Theory-a zir piah lamah a tak ngeia hmuh hi a chiang bikin, rilru ah pawh vawn leh hriat reng a awl bik a. Chuvang chuan Mizoram School-te pawh a huap zau thei ang bera he Tour atana thlan an nih thu a sawi.

Science Exposure Tour-ah hian Mizo-ram University leh Science College-te leh an Laboratory hrang hrang te, Sawrkar Department thenkhat hmalakna te leh Science Centre te an tlawh dawn. He Tour-ah hian zirlai 27 leh Zirtirtu mi 7 kalin, heng te hi Lunglei Govt. Higher Secondary School, Serchhip Govt. Higher Secondary School, Saitual Govt. Higher Secondary School, Kolasib-a St. John’s Higher Secondary School, Hnahthial Govt. Higher Secondary School, Champhai G.M. HSS leh Siaha Govt. HSS-a zirlai naupangte an ni.