Dan dinglai siamthatna tur Bill 2 pawm a ni

Nimin-a Assembly Thlasik thutkhawmah Chief Minister, Zoramthanga putluh Dan dinglai siamthatna tur Bill pahnih pawm a ni.

Nimin a pawm tak heng Bill te hi Company leh dan anga phalna neilo ten dawt hmanga mipui pawisa an chhuhsak thin do letna tur, The Mizoram Protection of Interests of Depositors (In Financial Estabilsment) Bill, 2019 leh Sawrkar-in bungraw chi hrang hrang a lei theihna dan kum 2008-a a siam, The Mizoram Transparency in Public Procurement Act, 2008-ah thil tul leh chuangtlai tam tak awmte paiha dan thar siamna tur, The Mizoram Transparency in Public Procurement (Amendment) Bill, 2019 a ni a, hengte hi sawiho a nih hnuah House chuan lungrual takin a pawm a ni. Nimin Assembly thutkhawm ah hian Assembly hnuaia Committee hrang hrang Subject Committee-I, Subject Committee-II leh Committee on Paper Laid Report-te pharh a ni bawk.