Assam Rifles sawnchhuak tura sawrkar hmalakna chuan rah tha a chhuah mek - Revenue Minister

Land Revenue & Resettlement Minister, Lalruatkima chuan Assam Rifles sawnchhuak tura sawrkar hmalakna chuan rah tha a chhuah mek tih sawiin, ramri ti chiang ngam sawrkar Mizoram mipuiin an nei chu thil lawmawm tak a nih thu a sawi bawk.

Nimin a MNF party in Aizawl-a an Office-a Chhung Inkhawm an neih ah Revenue Minister, Lalruatkima hian thu sawiin Pu Laldenga hunlai atang tawhin AR sawnchhuak turin hma an lo la tawh tih a sawi a, hetihlai hian Party pakhat hotupain ‘khawpui laili atangin sipai sawnchhuak ka hre ngai lo’ a ti tih sawiin, mahse Assam Rifles-te chu sawnchhuah an ni ngei dawn tih a chiang a, kumin Feb.19 khan Office Memorandum siamin Home Ministry in Assam Rifles-te insawnchhuah tur thu hi a tarlang tih a sawi a. Assam Rifles te insawnna turin sawrkarin a tih tur ang te a thawh nghal thu leh a hmunhma satu Contractor lamin hna an la thawh zawh loh vang chauhin an la insuan lut lo mai niin a sawi.
Ramri chungchang sawiin Lalruatkima chuan, tunhmain eng sawrkar mahin Mizoram ramri an tihchianna resolution emaw hmuh tur a awm lo niin a sawi a, Zoramthanga kaihhruai sawrkarin huaisen takin Bengal Eastern Frontier Regulation (BEFR), 1873 chu ramri atan a pawm a, ramri tichiang ngam sawrkar mipuiin an nei chu thil lawm-awm tak a nih thu sawiin, hetihlai hian ramri chungchang chu fimkhur taka hmalak ngai a nih avangin party mal emaw, mimal ang emaw-a thangthat lak tumna chi a ni lo, a ti bawk.
MNF General Secretary ni bawk, Lal-ruatkima chuan MLA te hlawh pun chungchanga ZPM hruaitu, Lalduhoma thusawi chu chhangin MLA hlawh tihpun chu eptu thenkhatin ti deuhin an pawm loh thu an sawi thu leh Eptu Group Leader, Zodintluanga Ralte in hlawh pun an duhloh takzet chuan hlawh pung la ve lo mai tura a ngaih thu a sawi chhuak hial tih a sawi a, hlawh tihpun chu Assembly General Purpose Committee in a ngaihtuah laiin Lalduhoma pawh a tel tih sawiin, “A duhlo tak tak a nih chuan Assembly House-a au chhuahpui lovin a telve na GPC Committee-ah sawi zawk awm tak a ni,” a ti bawk.

Comments

Chhiar Hlawhte