Assembly Thlasik thutkhawm tawp ni-ah Minister leh MLA te hlawh tihpunna tur pawm a ni

Nimin-a Mizoram Legislative Assembly Thlasik thutkhawmah Parilaimentary Affairs Minister, TJ. Lalnuntluanga putluh MLA-te hlawh sanna tura Bill pawm a ni a. Tun hi kum 1987-a State puitlinga Mizoram hlankai a nih hnuah MLA hlawh ennawn tum 4-na a ni.

He Bill puluttu TJ. Lalnuntluanga chuan, hun kal tawh atangin House chuan mipuite hmasawnna tur chi hrang hrang te, ei leh bara intodelh a nih theih nan te, mihring nun honaah zahawmna a awm theih nan leh hleih nei lova rorel a nih theih nan dan alo siam tawh thin a. Tunah hian sum leh pai-ah hnianghnar lutuk lo mah se, tunhnaiah sawrkar hnathawk hlawh a pung a, nitin khawsak phung mamawh chi hrang hrang man a san chhoh zel avangin mipui aiawha roreltu, MLA-te hlawh tihpunna tur Bill putluh a ngai ta chu inthlanhrun awm a tih thu a sawi a. Ram Danpuiin State Assembly chu MLA, Speaker, Dy. Speaker, Minister leh Chief Minister hlawh siam turin thuneihna a pe a. Hemi ang hian Mizoram State Legislative Assembly pawhin MLA hi a bituk thin a, MLA hlawh ennawn hnuhnung ber chu kum 2010 daih tawh kha niin, hemi hnu hian an mawhphurhna leh hmalakna nasa takin a pung a, State dang MLA-te tih ve ngai loh damlo kan te, mitthi ral, ruang phurh leh thil dang tam tak an tih thin avangin MLA lo ni tawhre intelkhawm, Former Legislators' Association of Mizoram (FLAM)-in MLA hlawh ennawn a rawt angin he ruahmanna siam a ni a. FLAM-in hlawh ennawn a ngaihtuahnaah hian MLA hluite chu a mimalin Party aiawh anga ruat ni lo mah se, he thil ngaihtuahnaah hian tuna Political Party hrang hrang aiawhte chu an tel deuh vek thu leh hei hi MLA-te hamthatna tura duan ni lovin zau zawka mipui rawng an bawl theihna tura ruahman a nih avangin he rawtna hi pawmpui vek turin member-te chu a ngen a ni.
Hemi hnu hian he Bill hi sawiho nghal a ni a, hetah hian Lalduhoma MLA chuan, he thil ah hian thlirna chi hnih an neih thu leh thlirna pakhatah chuan State dangte MLA hlawh nena khaikhin-in Mizoram MLA-te hlawh chu a sang hran lova, tunah a tihpunna tura ruahman pawh a san lutuk lem loh avangin thil tih awm loh lutuk a nih a hriat loh thu a sawi a. Hetihrual hian ZPM MLA-te chu inthlan dawna Val Upa Council-in Official Candidate-a a puante an ni a, an hnenah hian an thu hnial lo tur leh rinawm taka awm tura intiam an ni a. VUC hian he ruahmanna hi Pass pui lo turin a ngen a, a nihna takah chuan hei hian phuar lem lo mah se, a hringtu leh an mahni vang liau liau-a helai hmuna thu theih an nih avangin an thu hi hnial thei an ni lova. Hemi piah lamah hian Mizoram sawrkar chu sum lamah a harsa hle tih hriat a ni a, hetiang harsatna tawh a nih mek laia hlawh tihsanna tur lo pawm chu thil dik nia an hriat loh thu leh sawrkar chu sum leh pai enkawl kawngah insiamtha phawt se, inthlan dawna CM in mipuite a lo tiam tawh angin cheng nuai 3 sem ni phawt se tha an tih thu sawiin, General Purpose Committee (GPC) duh dan zah tak chungin he Bill hi an pawm ve thei lo tih a sawi a ni.
Congress Group Leader, Zodintluanga chuan, he ruahmanna hi FLAM-in ngun taka a ngaihtuaha rawtna a siam hnua a ngaihtuahtu tur bik a ruat Sub-Committee in a nghawng tur zawng zawng nen an zirchian hnua kalpui a nih thu leh tum danga MLA hlawh punna aia hniam tak a nih avangin Pass mai tha a tih thu a sawi ve thung a ni.
He Bill khaikhawmtu Chief Minister, Zoramthanga chuan, MLA hlawh tihsan thuah hian sawrkar chuan rawtna chi hrang hrang a dawn thu a sawi a. He Bill sawi honaah hian member 9-in an ngaihdan an sawi a, heng zinga member 7 chuan he Bill hi tha an tih thu leh an thlawp thu an sawi hlawm a. Lalduhoma leh Lalchhuanthanga erawh chuan he Bill hi tha viau angin lang mah se, an Pass pui theih loh thu an sawi thung a, hemi hnu hian Bill hi pass a ni.

Comments

Chhiar Hlawhte