Infiammi te chawisan tumna lam niin hrelo

ZPM Media Cell Chairman, PC. Vanlalruata chuan Mizoram sawrkar in Mizoram State Games kalpui an tum dan chu infiammite leh Sports chawisan tumna lam aiin cheng nuai thum an sem theih loh hliah-khuhna a ang ta ber niin a sawi.

Nimin a ZPM in Aizawl-a an Party Office-a Chhung Inkhawm an buatsaih ah PC. Vanlalruata hian thu sawiin Mizoram sawrkar kan hrawn mek chuan an Flagship Programe, SEDP atanga cheng nuai thum an sem theih dawn tak loh avangin, a aiah constituency sawmli (4) huapin Mizoram State Games min chhawpchhuah sak ta niin a sawi a. “Mizoram State Games buatsaih hi thalaite tan a lawmawm tehlul nen, thla hnih chhung em pawh inbuatsaihna hun an nei lo erawh a lungchhiat thlak hle a ni. Tunah hian MLA zawng zawng, ruling leh opposition-te an mangang hle a, Constituency tinah MLA te chu Chairman-ah an hmang a, mahse State pum huap Committee an la ko thei bawk si lo, an Committee din thar te chu an lu a hai hle a ni,” a ti bawk.

ZPM Media Cell Chairman chuan kan sawrkar thar hrawn mek chuan kal ngaihna a hre lo viau nia sawiin, “Tunah hian sawrkar buatsaihin Pawl Kut hman mek a ni a, inti Mizo Hnam party hle si hian Mizo Hnam Kut hman hun pawh an hre lo. Tunah hian Sahmulphah thla kan hmang mek a, buh seng mek lai, pawl pawh a la tlak hmain Pawl Kut min hmanpui ta ringawt mai a, January thlaa Chapchar Kut hman ang vel a ni,” a ti a. Hun kal tawhah khan sawrkar sponsor bawkin Pawl Kut hi hman a lo ni tawh thin nia sawiin, “Chuti chung siin Social Welfare Department website-ah chuan, ‘A vawikhatna atan Pawl Kut hman a ni’ tih tarlan a ni a, sawrkar hmasa thil lo tih tawh engahmah ngaihlohna leh palzutna lian tak a ni” a ti bawk.