Hlawh tihpun zahthlak ti

ZPM atanga Independent MLA atana thlan-tlin, Lalchhuanthanga chuan hlawh tihpun chu zahthlak a tih thu a sawi.

Nimin a Aizawl-a ZPM Chhung Inkhawm neih a Lalchhuanthanga MLA hian thu sawiin kum khat em pawh sawrkarna an la siam loh lai leh SEDP pawh an la sem theih hma hma-a hlawh tihpun chu a zahthlak hle tih sawiin, District pathum function-na tur pawh a la awm loh lai leh MLA in Candidate laia hlawh hresa a in Candidate an nih thu sawiin, hlawh tihsan phut leh tur chu in Candidate loh mai awm a tih thu a sawi bawk.

MNF chuan Congress sawrkar kha ‘Nuam-tawl Sawrkar’ tiin an dem nasa thin hle nia sawiin Lalchhuanthanga chuan, “An han sawrkar ve ta cheng a, budget-ah Council of Minister hman tur 40% a tihpun nghal a ni a, budget hi mipui ta a ni a, sawrkarin an ren lo hle a ni. Tuna kan state leiba vbc. 8847 bawr vel hi nausen piang hlim thlengin mi pakahatin Rs. 70,000/- vel ba ang kan nih laiin, MLA hlawh tihpun hi keini ZPM support MLA te chuan awm lo kan ti a ni,” a ti a. Tunah hian MNF MLA te chu MLA fang an awm tawh lo nia sawiin, “Board hrang hrang Chairman leh Vice Chairman an ni vek tawh, chung ho chu Minister of State rank pek vek an ni a, an enkawlna senso hi a hautak hle dawn a, chuvangin MNF sawrkar pawh hi nuam-tawl sawrkar dik tak a ni ” a ti bawk.

He hunah hian ZPM Secretary General, K. Sapdanga pawhin thu sawiin ZPM thlawp MLA te chuan pawisa tlem chung chungin an area-ah hna an thawk nasa hle tih sawiin, “Tun hmaa Party Fund-an chhunluh thin chu duh lovin ZPM support MLA te chuan an tihawm renga mawiin, kut tling taka an hnathawh hmuh tur a awm hi a lawmawm a ni,” a ti a. ZPM thlawp MLA ten hlawh tihpun dodal-a ‘an principle kalh a nih thu’ an sawi chu lawmawm a tih thu a sawi bawk.